बजेट नदिएको भन्दै सत्तारुढ सांसदद्वारा अर्थमन्त्रीको राजीनामा माग

काठमाडौं- संघीय संसदको प्रतिनिधिसभा सदस्य रेणुका गुरुङले अर्थमन्त्री डा. युवराज खतिवडाको राजीनामा माग गरेकी छन्।

प्रतिनिधिसभाका सांसदमध्ये प्रत्यक्ष निर्वाचित सांसदले निर्वाचन क्षेत्र विकास कोष कार्यक्रममार्फत् रकम पाएको र समानुपातिक सांसदले नपाएको भन्दै ‘असक्षम अर्थमन्त्री’ को राजीनामा माग गरेकी हुन्।

बिहीबार बसेको प्रतिनिधिसभा बैठकको शुन्य समयमा बोल्दै सांसद गुरुङले संघीय संसदमा समानुपातिकबाट प्रतिनिधित्व गर्ने सांसदहरुलेसमेत प्रधानमन्त्री बन्ने अधिकार भएको स्मरण गराउँदै लाखा र पाखा गर्न नहुने दाबी गरिन्।

समाजवादी पार्टीको तर्फबाट समानुपातिक सांसद गुरुङले प्रदेश नं. २ सरकारलेसमेत समानुपातिक सांसदहरुलाई डेढ करोड बजेट छुट्याएको उनको तर्क छ। सांसद गुरुङले समानुपातिक सांसदलाई बजेट नदिएकोमा विरोध गर्दै ‘कहीँ नभएको जात्रा हाँडी गाउँमा’ भएको टिप्पणी गरिन्।