जनकपुरमा ९ वटा ग्यास सिलिण्डर विस्फोट

जनकपुरधाम- जनकपुरस्थित एक होटलमा एकाबिहानै आधा दर्जनभन्दा बढी ग्यास सिलिण्डर विस्फोट हुँदा तीन होटल जलेर पूर्णरुपमा नष्ट भएको छ ।

बिहिबार बिहान करिब तीनबजे सिलिण्डर विस्फोट हुँदा जनकपुरको कदम चोकस्थित गोविन्द मिष्ठान भण्डार, सियाराम मिष्ठान भण्डार र एक अन्य होटल गरी तीनवटा भोजनालय जलेर नष्ट भएको प्रहरीले जनाएको छ । तीनवटा होटल जलेर नष्ट हुँदा ५० लाखभन्दा बढीको क्षति भएको जिल्ला प्रहरी कार्यालय धनुषाले जनाएको छ ।

एउटा होटलमा आगलगी भएर एकै ठाउँमा राखिएका ९ वटा ग्यास सिलिण्डरहरु श्रृंखलाबद्ध विस्फोट हुँदा ठुलो आवाज सुनिएको स्थानीयहरुले बताएका छन् । होटलभित्र राखिएको फ्रिजमा विद्युत सर्ट भइ आगलगि भएको हुन सक्ने धनुषाका प्रहरी उपरीक्षक शेखर खनालले बताएका छन् ।

ग्यास सिलिण्डर विस्फोटमा भौतिक क्षति भएपनि मानवीय क्षति नभएको खनालको भनाइ छ । घटनाबारे थप अनुसन्धान भइरहेको उनले बताए ।

बिहान सबैजना सुतिरहेको बेला एक्कासी ठुलो आवाजसहित आगोको मुस्लो देखिएको थियो । स्थानीयहरुका अनुसार आगोको ठुलो मुस्लो देखिनुका साथै चर्को आवाज सुनिएको थियो । वरपरका सर्वसाधारण उठेर घटनास्थलतर्फ पुगेका थिए ।