जनआन्दोलन बिर्साउने जनसागर, त्रिविमा गोल्ड मेडल नै किनबेच

काठमाडौं- राजधानीबाट प्रकाशित बिहीबारका राष्ट्रिय दैनिक अखबारहरुले गुठी विधेयकको विरोधमा राजधानीमा भएको विशाल प्रदर्शनलाई मुख्य समाचार बनाएका छन् । 

सरकारले विधेयक फिर्ता लिएपनि खारेजीको माग गर्दै गुठीसँग सम्बन्धीत व्यक्तिहरुले जनआन्दोलन विर्साउने गरि काठमाडौंमा प्रदर्शन गरेका हुन् ।

प्रदर्शनकारीहरुले भूमि व्यवस्था मन्त्री पद्मा अर्याल र सञ्चार मन्त्री गोकुल बाँस्कोटाको राजीनामासमेत मागेका छन् । उनीहरुले आफूहरुको माग पुरा नभएसम्म आन्दोलन जारी राख्ने बताएका छन् । गुठी जोगाउन उर्लिएको जनसागरले सिंहदरवारलाई ठूलै झट्का दिएको पत्रपत्रिकाले लेखेका छन्।

यसै विषयलाई मुख्य समाचार बनाउँदै नागरिक दैनिकले गुठीका पक्षमा जनसागर शीर्षकमा खबर लेखेको छ भने अन्नपूर्ण पोस्ट्ले उर्लियो जनसागर शीर्षकमा खबर छापेको छ ।

कान्तिपुर दैनिकले विशाल प्रदर्शनको फोटोलाई विशेष महत्वका साथ छाप्दै गुठी जोगाउन जनसागर शीर्षकमा क्याप्सन लेखेको छ । नयाँ पत्रिकाले गुठी विधेयक फिर्ता भए पनि प्रदर्शन शीर्षकमा खबर छापेको छ । 

प्रदर्शनको विषय बाहेक आजको नयाँ पत्रिकाले त्रिभुवन विश्विद्यालयमा गोल्ड मेडल नै किनबेच भएको खुलासा गर्दै मुख्य समाचार छापेको छ । गोल्ड मेडल खरिद–बिक्रीमा संलग्न त्रिविका एक कर्मचारी र विद्यार्थीलाई पक्राउ गरी अख्तियार दुरुपयोग अनुसन्धान आयोगले छानबिन थालेको समाचारमा उल्लेख छ ।
 
परीक्षा नियन्त्रण कार्यालय बल्खुको गोप्य शाखाका प्रमुख रामु कर्माचार्य र विद्यार्थी सुरेन्द्र कोइरालालाई आयोगले पक्राउ गरेको हो । पाटन क्याम्पसमा अर्थशास्त्र विषयमा स्नातकोत्तर तहमा अध्ययनरत कोइराला पेसाले अधिवक्ता हुन् ।

आफूलाई ‘गोल्ड मेडलिस्ट’ बन्ने रहरमा उनले कर्मचारी कर्माचार्यसँग आर्थिक ‘डिल’ गरेका थिए । परीक्षा नियन्त्रण कार्यालय बल्खुले लिने परीक्षामा चलखेल गर्ने कर्मचारी कर्माचार्यसहित दुईजनालाई पक्राउ गरिएको आयोगका प्रवक्ता प्रदीपकुमार कोइरालाले बताए । तर, विस्तृत विवरण आफूलाई जानकारी नभएको उनको भनाइ छ । 

स्रोतका अनुसार गोल्ड मेडल पाउने गरी उच्च अंक थप्न करिब पाँच लाख रुपैयाँ लेनदेन भएको छ । पनिकाका अन्य कर्मचारीमाथि समेत अनुसन्धान अघि बढाइएको समाचारमा जनाइएको छ ।

आजको अन्नपूर्णले वैदेशिक रोजगारीमा गएकामध्ये पछिल्लो एक दशकमा ७ हजार तीन सय चार जनाको ज्यान गएको विषयलाई पनि प्राथमिकताका साथ छापेको छ । नेपालबाट हरेक वर्ष चार लाख हाराहारीमा जनशक्ति वैदेशिक रोजगारीमा जाने तथ्यांक छ।

वैदेशिक रोजगार प्रवद्र्धन बोर्डले रोजगारमा जाने नेपालीलाई अपर्याप्त आराम, न्यून पारि श्रमिक, स्वास्थ्यमा लापरबाही र पारिवारिक झमेला तथा दबाबका कारण वैदेशिक रोजगारीमा जाने कामदारको मृत्यु हुने गरेको जनाएको छ। 

धेरै र कमसल रक्सी खाने, पानी कम पिउने, समयमा खानपानको प्रबन्ध नहुँदा स्ट्रोक, हृदयाघातजस्ता कारणले मृत्यु हुने गरेको छ। कार्यस्थलको असुरक्षा तथा अव्यवस्थित बसाइको कारणले पनि मृत्यु हुने गरेको समाचारमा उल्लेख छ । 

राजधानमीमा सञ्चालित बाल मन्दिर टहराको भरमा चलेको विषयलाई कान्तिपुरले प्राथमिकताका साथ छापेको छ । बस्ने ठाउँ गतिलो नहुँदा बाल मन्दिरमा बस्दै आएकी ६ महिनाकी बालिकाको मृत्यु भएको समाचारमा उल्लेख छ ।