गुठी विधेयक फिर्ता लिन सत्तापक्षकै दबाब, प्रधानमन्त्रीको सम्बोधन आज

काठमाडौं- राजधानीबाट प्रकाशित मंगलबारका राष्ट्रिय दैनिक अखबारहरुले प्रधानमन्त्रीलाई गुठी विधेयक फिर्ता लिन आफ्नै पार्टीका सांसद र नेताहरुले दबाब दिएको विषयलाई मुख्य समाचार बनाएका छन् । 

सोमबार प्रधानमन्त्री केपी शर्मा ओलीले आफ्नै पार्टी (नेकपा)का सांसद, मेयर, उपयमेयर र वडाअध्यक्षसँग गरेको छलफलमा उनीहरुले विधेयक फिर्ता लिन दबाब दिएका हुन् । केहिले सरकारले विधेयक फिर्ता नलिए अवस्था जटिल बन्नेसमेत चेतावनी दिएका थिए । 

यसैविषयलाई मुख्य समाचार बनाउँदै आजको कान्तिपुर दैनिकले विधेयकमा पछि हट्न सत्तापक्षकै दबाब शीर्षकमा मुख्य समाचार छापेको छ भने नागरिक दैनिकले गुठी विधेयकः फिर्ता लिन प्रधानमन्त्रीलाई आफ्नै सांसदको दबाब शीर्षकमा खबर लेखेको छ।

अन्नपूर्ण पोस्ट्ले गुठी विधेयकबारे प्रधानमन्त्री–जनप्रतिनिधि छलफलः फिर्ता लिन दबाब शीर्षकमा खबर छापेको छ । यो खबरलाई नयाँ पत्रिकाले भने पहिलो पृष्ठमा स्थान दिइको छैन् ।

छलफलमा विधेयक फिर्ता लिन नेकपाका सांसददेखि वडाअध्यक्षसम्मले दबाब दिएका थिए । उनीहरुले विधेयक स्थगन वा संसोधन गरेर मात्रै नहुने खालको भएकाले फिर्ता नै लिनु पर्नेमा धेरैजसोले जोड दिएका थिए ।

उनीहरुको सुझावपछि प्रधानमन्त्री ओलीले मन्त्रीपरिषद बैठकबाट आवश्यक निर्णय लिने बताएका थिए । सबैपक्षको माग उचित सम्बोधन हुनेगरि मन्त्रिपरिषद्बाट आवाश्यक निर्णय गरिने उनको भनाइ छ ।

प्रधानमन्त्री ओलीले गुठी विधेयक बारे सरकारको पछिल्लो धारणा संसदमा पेश गर्ने तयारी गरेका छन् । आजको बैठकमा उनले सरकार यस विधेयकका सम्बन्धमा कसरी अगाडी बढ्छ भन्ने विषयमा जानकारी गराउने आजका पत्रपत्रिकाले लेखेका छन् ।
 
यो विषय बाहेक आजका पत्रपत्रिकाले बझाङमा भएको जिप दुर्घटनामा परि १० जनाको मृत्यु भएको विषयलाई पनि प्राथमिकताका साथ छापेका छन् । साँघुरो र ठाडो उकालो घुम्तीमा गाडी चढाउन खोज्नु र क्षमता भन्दा बढि भार बोकेका कारण जिप दुर्घटना भएको प्रहरीको अनुमान छ ।