प्रधानमन्त्री ओलीले गुठी विधेयकबारे उपत्यकाका सांसद र विज्ञसँग छलफल गर्दै

काठमाडौं- प्रधानमन्त्री केपी शर्मा ओलीले गुठी विधेयकबारे काठमाडौं उपत्यकाका सांसद तथा यहाँका भूमि विज्ञहरुसँग छलफल थालेका छन्।

गुठी विधेयकको चौतर्फी विरोध भएपछि प्रधानमन्त्री ओलीले सोमबार दिउँसो बालुवाटारमा बोलाएर सांसद तथा विज्ञहरुसँग छलफल थालेको ओलीको सचिवालयले जनाएको छ।

छलफलका लागि उपत्यकाका धेरैजसो सांसद सहभागी भएका छन्। काठमाडौं जिल्लामा नेपाली कांग्रेसबाट निर्वाचित अधिकांश सांसदहरुले हिजो विधेयकको विरोध गर्दै कार्यक्रम गरेका थिए।

गुठी विधेयकको विरुद्ध काठमाडौंमा लगायतार प्रदर्शन भइरहेका छन्। नेवार समुदायको बाहुल्यता रहेको काठमाडौंमा जारी प्रदर्शनले प्रधानमन्त्रीलाई छलफलका लागि बाध्य बनाएको हो। सत्तारुढ नेकपाभित्रै पनि उपत्यकाका सांसदहरुले विधेयकप्रति तिब्र असन्तुष्टी व्यक्त गरेका छन्।

विधेयक विरुद्धको आन्दोलनमा प्रतिपक्षी दल कांग्रेसले एक्यबद्धता जनाइसकेको छ।