उखरमाउलो गर्मी कहिलेसम्म ? 

काठमाडौं- केही दिनयता लगातार बढेको गर्मी अझै केहि दिन कायमै रहने भएको छ ।

मनसुन नभित्रिएसम्म गर्मी कम नहुने जल तथा मौसम पूर्वानुमान महाशाखाले जनाएको छ । फाट्टफुट्ट वर्षा भएपनि त्यसले तापक्रम नघटाउने मौसमविद् समिर श्रेष्ठले जानकारी दिए ।  

मौसमविद् अनुसार यसवर्ष मनसुन भित्रिन ढिलो भएकै कारण गर्मी बढेको हो । सामान्यतया नेपालमा जुन १० तारिखमा मनसुन भित्रिने गर्छ। तर, यसवर्ष जुन १७ भइसक्दा पनि अझैसम्म मनसुन भित्रिएको छैन् । जसका कारण तराई क्षेत्रको तापक्रम ४३ डिग्री नाघेको छ । काठमाडौं उपत्यकामा समेत ३४ डिग्री तापक्रम पुगेको  छ। 

अबको एक हप्ता भित्र नेपालमा मनसुन भित्रिने र त्यसले क्रमश तापक्रम घटाउँदै लैजाने मौसमविद् श्रेष्ठले बताए । उनका अनुसार मनसुन नेपालको सिमा क्षेत्रमा आइपुगेको छ । जुन २० तारिकसम्ममा नेपालको पूर्वी क्षेत्रमा मनसुन आइपुग्ने उनले बताए । 

यस्तै आज साँझ देशका पहाडी क्षेत्रमा हल्कादेखि भारी वर्षा हुने जल तथा मौसम पूर्वानुमान महाशाखाले जनाएको छ । तराई क्षेत्रमा भने वर्षाको सम्भावना अत्यन्त न्यून छ । 

काठमाडौं उपत्यकामा भने फाटफुट वर्षाको सम्भावना रहेको मौसमविद् श्रेष्ठले जानकारी दिए। मंगलबार पनि मौसम करिब यस्तै हुने उनले बताए ।