सुनका गहना र नगदसहित चार पक्राउ 

धनगढी- कैलाली प्रहरीले चोरीका सुनका गहना र नगदसहित चार युवालाई पक्राउ गरेको छ । भारतबाट चोरी गरेर ल्याएको सुन, नेपाली र विभिन्न देशको मुद्रासहित प्रहरीले चार जनालाई पक्राउ गरेको हो । 

कैलाली प्रहरीले शुक्रबार पत्रकार सम्मेलनको आयोजना गरि गहन र नगदसहित पक्राउ परेकालाई सार्वजनिक गरेको हो ।

पक्राउ पर्नेमा कंचनपुर कृष्णपुर नगरपालिका- ४ का ३८ वर्षीय मानबहादुर कार्की, सोही ठाउको वडा नम्बर ५ बस्ने ४३ बर्षीय सन्तोष भट्टराई, कैलाली गौरीगंगा नगरपालिका– ८ का २१ बर्षीय कुमार भुल र गोदावरी नगरपालिका७ बस्ने २८ बर्षीय योगेन्द्र बिक रहेका छन् । 

उनीहरुले भारतको लुदियाना पंजाव गुरुनगर बस्ने पुनम मलोत्राको घरबाट सुन र हिराका गरगहना र नगद चोरी गरेको सुचनाका आधारमा पक्राउ गरिएको कैलाली प्रहरी प्रमुक प्रहरी उपरीक्षक सुदिप गिरीले जानकारी दिए । 

मलोत्रासहितको टोली नेपाल आएर प्रहरीलाई खवर गरेपछि चोरीमा संलग्नहरुलाई बिभिन्न ठाउबाट पक्राउ गरिएको गिरीले बताए । चोरीमा संलग्न केही व्यक्ती फरार रहेको प्रहरीले जनाएको छ। 

मलोत्राले प्रहरीमा बुझाएको बिबरण अनुसार थुप्रै सुन र हिराका गहना अझै फेला पर्न सकेका छैनन् । बरामद गरिएको केही गहनाहरु आफ्नो नभएको मलोत्राले बताईन् । परिवार बाहिर गएको मौका छोपेर घरमा काम गर्ने एक नेपालीलाई बेहोस हुने औषधी खुवाई मे ११ तारिखको दिन चोरी भएको उनले जानकारी दिईन् । 

प्रहरी उपरीक्षक गिरीले पक्राउ परेख समूह यसअघि पनि भारतका विभिन्न ठाउमा चोरी गरेर फरार रहेको बुझिन आएको जानकारी दिए । पंजाबमा मात्रै एक महिनाको अवधिमा  तीन घरमा चोरी भएको खबर प्रहरीलाई आएको उनले सुनाए ।