जेसीबीले अटोरिक्सालाई ठक्कर दिँदा ३ जनाको मृत्यु        

महेन्द्रनगर- कञ्चनपुरको भीमदत्त नगरपालिकामा शुक्रबार बिहान जेसीबीले अटोरिक्सालाई ठक्कर दिँदा तीन को मृत्यु भएको छ ।

महेन्द्रनगरबाट गड्डाचौकी जाँदै गरेको से १ क ७३३ नम्बरको जेसीबीले विपरीत दिशाबाट आउँदै गरेको म १ ह ७६३ नम्बरको अटोरिक्सालाई ठक्कर दिएको थियो ।

उक्त दुर्घटनामा परेर अटोरिक्सामा रहेका तीनको मृत्यु भएको डीएसपी ज्ञान विष्टले जानकारी दिए ।  दुई पुरुष र एक महिलाको दुर्घटनामा परेर मृत्यु भएको छ । घाइते तीनको अहिले अञ्चल अस्पतालमा उपचार भइरहेको प्रहरीले जनाएको छ । 

घाइतेमध्ये एक जनाको अवस्था गम्भीर रहेको डीएसपी विष्टले बताए । दुर्घटनामा घाइते भएका भीमदत्तनगरपालिका–१० का १८ वर्षीया जगदीश पार्की, बैतडी देहीमाडौँका ३२ वर्षीया लक्ष्मी बोहरा, उहाँका तीन वर्षीया छोरा निशान्त बोहरा, भीमदत्तनगरपालिका–११ का २६ वर्षीय प्रेम थापा र बेल्डाँडी गाउँपालिका–७ का २६ वर्षीय सन्तोष लुहार रहेको छन् ।

मृतकको सनाखत हुन नसकेको प्रहरीले जनाएको छ । जेसिबी चालक भने फरार रहेको प्रहरीले जनाएको छ ।