आयोगले निर्णय नगर्दासम्म लोकसेवाको आवेदन नरोकिने

काठमाडौं- राज्य व्यवस्था तथा सुशासन समितिले भर्ना प्रक्रिया रोक्न निर्देशन दिएकै भरमा आवेदन लिने क्रम नरोकिने लोकसेवा आयोगले स्पष्ट पारेको छ । आयोग पदाधिकारीको बैठकले निर्णय नगर्दासम्म आवेदन प्रक्रिया नरोकिने जनाएको हो । 

आयोगका प्रवक्ता किरणराज शर्माले समितिको पत्र आयोगलाई प्राप्त भइसकेकाले चाँडै नै पत्रबारे आयोग पदाधिकारीको बैठक बसेर निर्णय गर्ने बताए । समितिको विज्ञापन रद्द गर्ने निर्देशनको पत्र बुधबार आयोगमा पुगेको छ । 

“समितिको निर्देशन आयोगमा दर्ता भइसकेको छ । अब समितिले दिएको निर्देशनलाई बैठकमा प्रस्तावको रुपमा लैजान्छौँ”, शर्माले भने, “यस सम्बन्धमा छलफल गरेर मात्रै हामी छिट्टै समाधान दिन्छौँ । आयोगले पत्रबारे निर्णय नगर्दासम्म आवेदन फाराम रोकिन्न ।” परीक्षार्थीलाई अप्ठ्यारो नपरोस् भन्नेतर्फ आयोग सचेत रहेकाले चाँडै नै निर्णय गरिने उहाँको भनाइ थियो । 
  
सोमबार समितिले स्थानीय तहको लागि खोलिएको नौ हजार १६१ पदको विज्ञापन रद्द गर्न सरकारलाई निर्देशन दिएको थियो । शर्माले आयोग स्वच्छ निकाय भएकाले कानून र संविधानको पूर्ण पालना गर्ने भन्दै आयोग कुनै विवादमा नआउने बताए । आयोगले समितिको निर्देशन तथा निर्णयलाई सम्मान गर्ने उनले बताए । 

प्रवक्ता शर्माका अनुसार समितिको निर्णयपछि आवेदन दिनेको संख्या झनै बढेको छ । अहिलेसम्म भरिएका सबै आवेदन सदर भएको आयोगले जनाएको छ । आयोगका प्रवक्ता किरणराज शर्माका अनुसार अहिलेसम्म करिब १ लाखको आवेदन परिसकेको छ ।