लोकसेवाको विज्ञापन रद्द गर्न सरकारलाई निर्देशन

काठमाडौं- संघीय संसदको राज्य व्यवस्था तथा सुशासन समितिले लोकसेवा आयोगको विज्ञापन रद्द गर्न सरकारलाई निर्देशन दिएको छ।

सोमबार बसेको समितिको बैठकमा संघीय मामिला तथा समान्य प्रशासन मन्त्री लालबाबु पंडितसँगको छलफल पछि समितिले विज्ञापन रद्द गर्न निर्देशन दिएको हो।

स्थानीय निकायमा कर्मचारी भर्नाका लागि लोकसेवा आयोगले हालै विज्ञापन गरेको थियो। उक्त विज्ञापन समानुपातिक समावेशी नभएको र प्रदेश सरकारको अधिकार मिचेको भन्दै विरोध भइरहेको छ।

विज्ञापनको चौतर्फी विरोध भएपछि समितिले छलफलका लागि मन्त्रीलाई बोलाएको थियो। तर, मन्त्री पंडित समितिको बैठकमा आउन आनकानी गर्दै आएका थिए। मन्त्री पंडितप्रति समितिका सांसदहरुले आक्रोस समेत व्यक्त गरेका थिए।

सोमबार मात्र समितिको बैठकमा पुगेका मन्त्री पंडितसँगको छलफल पछि समितिले विज्ञापन रद्द गर्न निर्देशन दिएको हो। सबै प्रक्रिया मिलेपछि समानुपातिक समावेशी सिद्धान्त अनुसार मात्र विज्ञापन गर्न निर्देशनसमेत दिएको छ।