चन्दा नदिएपछि मेयरमाथि नै कुटपिट

रौतहट- चन्दा नदिएको भन्दै रौतहटको राजपुर नगरपालिकाका मेयर शेख सकिल कुटिएका छन् । स्थानीय युवाहरुले मुस्लीम भएर पनि मुस्लीमको पर्व मनाउन चन्दा नदिएको भन्दै कुटपिट गरेका हुन् ।
 
मेयरसकिललाई मंगलबार राति राजपुरको महम्मुदिया मस्जिदमा कुटपिट भएको स्थानीयले बताए । मस्जिदमा नमाज पढ्न गएका मेयर सकिलसँग स्थानीयले आर्थिक सहयोग मागेपछि उनले अहिले तत्काल खल्तीमा नभएको र भोलि दिने बताए लगतै कुटपिट गरेको बताइएको  छ।
 
इदमा कार्यक्रम गर्नका लागि स्थानीयले मेयरसँग चन्दा सहयोग माग गरेका थिए । इदको अघिल्लो दिन मंगलबारसम्म पनि मेयरले सहयोग रकम नदिएपछि आक्रोशित बनेका शेख कासिमलगायतका व्यक्तिहरुले आक्रमण गरेको मेयर सकिलले जानकारी दिए ।

केही व्यक्तिहरुले टर्चलाइटले टाउकोमा प्रहार गर्दै कुटपिट गरेको मेयर सकिलले बताए । टाउकोमा चोट लागेका उनी उपचारपछि घर फर्किएका छन् । 

मेयरमाथि हातपात गर्ने समुहको पहिचान भएको र खोजी कार्य तिब्र पारिएको रौतहट प्रहरी प्रवक्ता डीएसपी नवीन कार्कीले जानकारी दिए ।