ढिलासुस्ती गर्ने ठेकेदारलाई धरपकड

वीरगंज- सार्वजनिक भौतिक पूर्वाधारको निर्माण गर्न ठेक्का लिएर वर्षौसम्म काम नगर्ने ठेकेदारलाई स्थानीय प्रशासनले धमाधम पक्राउ गर्न थालेको  छ ।

हुलाकी राजमार्गको तिलावे नदीमा पुल निर्माणको काम ठेक्का लिएकोमा सम्झौता अवधी नाघि सक्दा समेत विभिन्न बहानाबाजी गरेर आलटाल गरिरहेको पप्पु कन्स्ट्रक्सनका इन्जिनियर सन्तोष साह र चौरसिया निर्माण सेवाका संचालक धिरज चौरसियालाई नियन्त्रणमा‌ लिएर कारवाही शुरु गरेको हो ।

जिल्ला प्रशासन कार्यालय पर्साका अनुसार ठेकेदारको लापरवाहीका कारण लामो समय देखि अलपत्र रहेका ३८ वटा सार्वजनिक पूर्वाधार निर्माण कार्य तत्काल शुरु गर्न निर्माण व्यवसायीलाई चेतावनी दिइएको छ ।

प्रमुख जिल्ला अधिकारी नारायण प्रसाद भट्टराईले कार्ययोजना सहित काम शुरु गर्ने प्रतिबद्धता व्यक्त गर्ने निर्माण व्यवसायीलाई मोहलत दिनेछौँ, अटेर गरेमा सार्वजनिक खरिद ऐन अन्तर्गत कारवाही शुरु गर्नेछौं ।

जिल्ला प्रशासनले वर्षौदेखि निर्माण कार्य अधुरो छोडेका ठेकेदारको सूची तयार पारेर पक्राउ गर्न प्रहरी परिचालन गरेको छ । जिल्ला प्रशासनले गत साता पप्पु कन्स्ट्रक्सन र चौरसिया निर्माण सेवाका प्रतिनिधिलाई एक रात प्रहरी  हिरासतमा राखेर चेतावनी सहित मुक्त गरेको थियो ।

पर्सा जिल्लामा आधा दर्जन भन्दा बढी सार्वजनिक पूर्वाधार निर्माणको ठेक्का पाएको पप्पु कन्स्ट्रक्सनले अधिकांश निर्माण कार्य अधुरो रहेको छ ।पर्सागढी नगरपालिका वडा ८ एकटाङ्गको थरुहट सडक जोड्ने तिलावे नदीको पुल अझैसम्म पिलर समेत निर्माण गरेको छैन ।

५ करोड रुपैयाँ लागतमा तीनवर्ष भित्र सम्पन्न गर्नुपर्ने भएपनि सम्झौता अवधि सकिएको दुई वर्ष बितिसक्दा समेत काम सम्पन्न नभएको हो ।

निर्माण व्यवसायी संघ पर्साका अध्यक्ष रमाकान्त चौरसियाले सार्वजनिक खरिद ऐन अन्तर्गत नेपाल सरकारसँग सम्झौता गरेका निर्माण व्यवसायीलाई 
सिडिओले थुन्न नमिल्ने बताए । 

अहिले प्रशासनको सकृयतापछि निर्माण व्यवसायी सकृय भएका छन् । तर सम्पन्न भइसकेको कामको भुक्तानी नपाएको कारण पनि केही व्यवसायीले बाँकी काम गर्न नसकेको अवस्था छ ।