प्रदेश सरकारको लगानी बालुवामा पानी, सारेको बस्तीमै पहिरो जाँदा बगे ४ घर

रोल्पा- रोल्पामा बाढीले ४ घर बगाएको छ। शुक्रबार राति आएको वर्षाका कारण रोल्पाको सुनछहरी गाउँपालिका–१ बाछेममा पहिरोले बगाएको प्रहरीले जानकारी दिएको छ। 

रणबहादुर घर्ती, टेकमाला घर्ती, गजमा घर्ती र मनपुरा घर्तीको घर बगाएको इलाका प्रहरी कार्यालय पोबाङले जनाएको छ। अन्य ५ वटा घरमा पनि आंशिक रूपमा क्षति पुगेको छ। दिलबहादुर घर्ती, चिमा घर्ती, धनमाला घर्ती, विजयी घर्ती र दलबहादुर घर्तीको घर उच्च जोखिममा रहेको छ।

फुलिवनमा पहिरोको उच्च जोखिम भएपछि गएको वर्ष बाछेममा सारिएको नयाँ बस्तीमा पनि पहिरो गएको हो। पहिरोले नयाँ बस्ती उच्च जोखिमा रहेकाले रातको समयमा सबै सुरक्षित ठाउँमा थिए। त्यसैले मानवीय क्षति हुन नभएको हो। 

प्रदेश सरकारको १५ करोड रुपैयाँ लगानीमा फुलिवनबाट ४० घर परिवारलाई बाछेमको नयाँ बस्तीमा सारिएको थियो। प्रदेश सरकारको लगानी गरिएको नयाँ बस्ती पनि पहिरोले बगाएको हो। भूगर्भविद् र स्थानीय सुझावलाई बेवास्ता गरी बस्ती सारिएको थियो।