निर्मला हत्या प्रकरण : बर्खास्त एसपी बिष्टकाे थुनछेक बहस सकियाे

काठमाडाैं - निर्मला पन्तको हत्या प्रकरणमा यातना दिएको र प्रमाण नष्ट गरेको अभियोग लागेका तत्कालीन एसपी दिल्लीराज विष्टको बहस सकिएको छ। विष्टको शुक्रबार बहस सकिएको हो। बहस सकिए पनि समय अभावले आदेश भने आउन सकेको छैन।

बहस सकिएसँगै आदेशकालागि समय अपुग भएकाले आइतबार बिहान १० बजे बोलाइएको जिल्ला अदालत कञ्चनपुरका श्रेस्तेदार हरिकृष्ण अवस्थीले बताए। अदालतको आदेश नआएकाले विष्टलाई जिल्ला प्रहरी कार्यालय कञ्चनपुरकैअ हिरासतमा राखिने भएको छ।

विष्टसँगै फरार रहेका सीआईबीका बहालवाला डीएसपी अंगुर जिसी भने अझै सम्पर्कमा आएका छैनन्। निर्मला पन्त हत्या प्रकरणका अन्य ६ जना आरोपित भने धरौटीमा छुटिसकेका छन्। न्यायाधीश राजेन्द्रकुमार आचार्यको इजलासले तत्कालीन डिएसपी ज्ञानबहादुर सेठी, प्रहरी निरीक्षकद्वय एकेन्द्र खड्का र जगदीशप्रसाद भट्ट, सईद्वय हरिसिंह धामी र रामसिंह धामी तथा जवान चाँदनी साउदलाई अदालतले धरौटीमा छाड्ने आदेश दिएको हो ।