'कम्युनिस्ट र राजावादीले मुलुकलाई अस्तव्यस्त बनाए'

धादिङ - नेपाली कांग्रेसका वरिष्ठ नेता रामचन्द्र पौडेलले प्रधानमन्त्री केपी ओली समृद्धिको नारा लगाएर मुलुकमा सर्वसत्तावाद लाद्ने अभियानमा लागेको आरोप लगाएका छन्। धादिङको सिम्लेमा आयोजित कार्यकर्ता भेटघाट कार्यक्रममा नेता पौडेलले प्रधानमन्त्री ओलीले सबै अधिकार आफूमा केन्द्रित गरेर सर्वसत्तावादी बन्न लागेको बताएका हुन्।

पौडेलले सर्वसत्तावादीको सपना नदेख्न पनि प्रधानमन्त्री ओलीलाई चेतावनी दिँदै भने, ‘प्रधानमन्त्री केपी ओली मुलुकको समृद्धि नारा लगाइरहनुभएको छ। तर, मुलुक समृद्ध हुने काम एक वर्षमा केही भएका छैनन्। तर, ओलीजी सबै अधिकार आफैंमा केन्द्रित गरेर सर्वसत्तावादी बन्ने अभियानमा हुनुहुन्छ। कांग्रेस रहुन्जेल सर्वसत्तावादको सपना नदेखे हुन्छ।’ 

पौडेलले कम्युनिस्ट र राजावादीहरुले मुलुकलाई अस्तव्यस्त बनाएको आरोप लागाए। उनले भने, ‘हिजो सत्तामा भएका राजा र सत्ताबाहिर रहेका कम्युनिस्टको अतिवादले मुलुकलाई अस्तव्यस्त बनायो। आज फेरि सत्तामा कम्युनिस्ट अतिवाद, अनि हिंसामा विप्लवको अतिवाद र तराई सिके राउतको अतिवाद छ।’