जनकपुरको होलीमा सेतो कुर्ताको ‘डिमान्ड’

जनकपुरधाम- पहाडी जिल्लामा बुधबार होली मनाइएको छ भने तराइकै अधिकांश जिल्लाहरुमा हर्षोल्लासपूर्वक विहिबार सम्पत्र भएको छ । तर जनकपुरमा भने शुक्रबार होली मनाइँदै छ ।

१५ दिने मिथिला मध्यमा परिक्रमा सम्पत्र भएको भोली पल्ट होली मनाउने परम्परा अनुसार जनकपुरमा शुक्रबार होली मनाउन लागिएको हो । यस वर्ष होलीमा सेतो कुर्ता र गमछाले विशेष प्राथमिकता पाएको छ जनकपुरमा ।

होली आउनु अगाबै विभित्र संघसंस्थाले शुभकामना अदानप्रदान गर्न आयोजना गरेको होली मिलन समारोहमा समेत सेतो कुर्ता र गमछाले विशेष प्राथमिकता पाएको छ । आयोजक संस्थाहरुले उपहारस्वरुप कुर्ता नदिएपनि सेतो रङ्गको गमछा आमन्त्रित सबैलाई दिएको छ ।

यसका साथै बजारमा पनि सेता रङ्को कुर्ता र गमछाको व्यापक माग देखिएको छ । होलीका लागि अधिकांश व्यक्तिहरुले सेतो कुर्ता र गमछा खोज्ने गरेको बताउँछन् स्थानीय व्यवसायी अमित पाठक । विगतका वर्षहरुको तुलनामा यस वर्ष कुर्ता र गमछाको मागमा ह्वात्तै वृद्धि भएको उनको भनाइ छ ।

जनकपुर बजारमा मागअनुसार सेता कुर्ता र गमछाको आपूर्ति हुन नसकेको उनको भनाइ छ । अधिकांश व्यक्तिहरुको रोजाइमा परेको कुर्ता र गमछा आपूर्ति गर्न स्थानीय व्यवसायीहरुलाई समस्या परेको पाठकले बताए । सडक विस्तारका कारण अस्तव्यस्त रहेको जनकपुरका व्यवसयायीहरुले आवश्यकता अनुसार आयात गर्न नसक्दा अभावझैंं भएको उनले बताए ।
 
तीन सय पचास देखि पाँच सयसम्म मूल्य पर्ने सेता कुर्ता खरिद गर्नेहरुको संख्या धेरै रहेपनि मागअनुसार पूर्तिमा समस्या देखिएको उनले बताए । पाठकका अनुसार होलीको अवसरमा कुर्ता र गमछामा मात्रै झण्डै दुई करोड मूल्य बराबरको छ । एकजना व्यापारीले प्रतिदिन  २० हजार देखि ३० हजारसम्मको कुर्ता बेचेको उनको अनुमान छ ।