निर्मला हत्या प्रकरण : बर्खास्त एसपी बिष्ट अदालतमा हाजिर

कञ्चनपुर - निर्मला पन्त हत्या प्रकरणमा बर्खास्तमा परेका नेपाल प्रहरीका एसपी डिल्लीराज विष्ट मंगलबार बिहान जिल्ला अदालत कञ्चनपुरमा हाजिर भएका छन्। विष्ट अदालतमा हाजिर भएको जानकारी स्रेस्तेदार हरिकृष्ण अवस्थीले दिए। यसअघि अदालतले विष्ट र डिएसपी अंगुर जीसीलाई अदालतमा हाजिर हुन सूचना जारी गरेको थियो। उनको अहिले अदालत समक्ष बयान जारी छ। बयान सकिए लगत्तै थुनछेक बहस हुने श्रेस्तेदार हरिकृष्ण अवस्थीले जानकारी दिए। डिएसपी अंगुर जिसी भने फरार नै छन्।

निर्मला पन्त हत्या प्रकरणका अन्य छ जना आरोपित भने धरौटीमा छुटिसकेका छन् । न्यायाधीश राजेन्द्रकुमार आचार्यको इजलासले तत्कालीन डिएसपी ज्ञानबहादुर सेठी, प्रहरी निरीक्षकद्वय एकेन्द्र खड्का र जगदीशप्रसाद भट्ट, सईद्वय हरिसिंह धामी र रामसिंह धामी तथा जवान चाँदनी साउदलाई धरौटीमा छाड्ने आदेश दिएको हो ।