परिषद् बैठकमा सिकेलाई प्रश्न : सरकारसँगको सहमति के हो? 

जनकपुरधाम - सिके राउत संयोजक रहेको स्वतन्त्र मधेश गठबन्धनको राष्ट्रिय परिषद् बैठक आइतबारदेखि सिरहाको लहानमा सुरु भएको छ। लहानस्थित मारवारी सेवाश्रममा जारी बैठक नेपालको राष्ट्रियगानबाट सुरु भएको हो।

पञ्चकन्याहरुले राष्ट्रियगान गाएर बैठकको शुभाारम्भ गरेका थिए। कडा सुरक्षाबीच जारी गोप्य बैठकमा सहभागीहरुको मोबाइलफोनसमेत बैठकस्थलभित्र निषेध गरिएको छ। बैठकस्थल वरपर सुरक्षाव्यवस्था कडा पारिएको छ। बैठकमा सहभागीलाई नागरिकताको प्रमाणपत्र देखाएरमात्रै प्रवेश दिइएको छ।

आइतबारको बैठकमा सहभागीहरुले सरकारसँग हालै भएको ११ बुँदे सम्झौताबारे स्पष्ट पार्न गठबन्धनका संयोजक राउतसमक्ष आ–आफ्नो धारणा राखेको बताइएको छ। बैठकका सहभागीहरुले आ–आफ्ना जिज्ञासाहरु राखिसकेपछि राउतले सोमबारको बैठकमा जवाफ दिने बुझिएको छ।

सरकारसँग ११ बुँदे सम्झौता गरी मूलधारको राजनीतिमा आएपछि पहिलो पटक हुन लागेको बैठकमा गठबन्धनले लिने आगामी रणनीतिबारे छलफल हुने जनाइएको छ। १२ फागुनमा सरकारसँग अचानक सम्झौता गरी मूलधारको राजनीतिमा अवतरण गरेका गठबन्धनका संयोजक सिके राउतको तर्फबाट हालसम्म कुनै आधिकारिक प्रतिक्रिया आउन सकेको छैन्।

राष्ट्रिय परिषद्को बैठक सम्पत्र भइसकेपछि स्वतन्त्र मधेशको अभियान चलाउँदै आएका राउतले आगामी रणनीतिबारे स्पष्टपार्ने तयारी रहेको बताइएको छ। सरकारसँग सम्झौता गरेर सिके राउतले गठबन्धनले अघि सारेको स्वतन्त्र मधेशको एजेन्डा पाखा लगाएको भन्दै कतिपय कार्यकर्ताहरु असन्तुष्ट रहेको बताइएको छ। यसैगरी प्रहरी हिरासतमा निधन भएका राममनोहर यादवलाईसमेत गठबन्धनले सहिद घोषणा गराउन नसकेको भन्दै अधिकांश कार्यकर्ता असन्तुष्ट रहेको बताइएको छ।

बैठकमा २३ जिल्लाका दुई सयभन्दा बढी केन्द्रीय परिषद सदस्यहरुको उपस्थिति रहेको छ । सोमबारसम्म चल्ने बैठकपछि सिके राउतलाई लहान र सप्तरीको राजविराजमा नागरिक अभिनन्दन गर्ने कार्यक्रमसमेत रहेको बुझिएको छ ।