भारतीय प्रधानमन्‍त्री माेदी बने 'चाैकिदार'

काठमाडाैं - भारतका प्रधानमन्त्री नरेन्द्र मोदीले आफ्नो नयाँ नामाकरण गरेका छन्। मोदीले आफ्नो नयाँ नाम चौकिदार नरेन्द्र मोदी राखेका छन्। मोदीले मात्रै नभई बीजेपी अध्यक्ष अमित शाह, रेल मन्त्री पीयुष गोयललगायत अन्य थुप्रै बीजेपीका नेता तथा कार्यकर्ताहरुले आफ्नो नाम अघि चौकिदार शब्द थपेका हुन्।

मोदीले सामाजिक सञ्जाल ट्विटरमा आफ्नो नामको अगाडि चौकिदार शब्द थपेका हुन्। उनको नयाँ नाम अब चौकिदार नरेन्द्र मोदी भएको छ। बीजेपीको म पनी चौकिदार अभियान अन्तर्गत उनीहरुले आफ्नो नामको अघि चौकिदार शब्द थप गरेका हुन्।

प्रधानमन्त्री मोदीले केही दिन अघिमात्रै भ्रष्टाचार, अनियमितता तथा सामाजिक दुराचार विरुद्ध लड्ने तथा देश विकासका लागि लागिपर्ने हरेक नागरिक एक चौकिदार भएको बताएका थिए। आइतबार प्रधानमन्त्री मोदीले आफ्नो ट्विटरमा चौकिदार थप गरेसँगै बीजेपीका सम्पूर्ण नेता तथा कार्यकर्तालेसमेत चौकिदार शब्द थपेका छन्।