बर्डफ्लु भेटिएको हेटौँडामा १३ हजार कुखुरा मारियो

मकवानपुर- बर्डफ्लुको पुष्टि भएसँगै  हेटौँडामा कुखुरा नष्ट गर्ने क्रमलाई तिब्रता दिइएको छ । 

आइतबार बिहानसम्म १३ हजार बढि कुखुरा नष्ट गरिएको छ । शनिबार बिहानदेखि कुखुरा नष्ट गर्ने अभियान थालिएको थियो । हेटौंडा ७ नागस्वतिको वर्डफ्लु प्रभावित क्षेत्रमा रहेका कुखुराहरु मारिएको प्रमुख जिल्ला अधिकारी आस्मान तामाङले जानकारी दिए । 

भेटनरी अस्पताल हेटौँडा, कुखुरा ब्यवसायी संघ, जिल्ला प्रहरी कार्यालय सहित स्थानीय कुखुरा ब्यवसायीहरुको सहभागितामा दिनभर र रातभरी पनि कुखुरा मारिएको उनले जानकारी दिए । कुखुरा नष्ट गर्ने क्रमले आइतबार दिनभर पनि निरन्तरता पाउने उनले बताए । 

प्रमुख जिल्ला अधिकारी तामाङको अध्यक्षतामा शुक्रबार बसेको बैठकले ४१ हजार ५ सय कुखुरा नष्ट गर्ने निर्णय गरेको थियो । बर्डफ्लु संक्रमित पाईएको हेटौंडा ७ नागश्वतीका कुलप्रसाद चौलागाईले सञ्चालन गरेको फर्मबाट दायाँबायाँ सिमा निर्धारण गरि त्यस क्षेत्रमा पर्ने कुखुरा मार्ने निर्णय भएको हो ।