सरकारको निर्णयपछि विप्लवविरुद्ध प्रहरी ‘एक्सन’ मा

काठमाडौं- सरकारले विप्लव नेकपालाई प्रतिबन्ध लगाएसँगै सुरक्षा निकायले उसका गतिविधिमाथि निगरानी बढाएको छ ।

विप्लवका गतिविधिमाथि नियन्त्रण गर्ने मन्त्रिपरिषद्को मंगलबारको निर्णयपछि गृह मन्त्रालयमा बुधबार बसेको सुरक्षा निकायहरुको बैठकले थप आक्रामक बन्ने रणनीति तय गरेको  छ । बैठकमा विप्लव समूहका गतिविधिलाई निस्तेज गर्ने योजना र त्यसलाई आवश्यक पर्ने सुरक्षा रणनीतिबारे छलफल भएको स्रोतले बतायो।

सरकारको निर्णयपछि गृहले नेपाल प्रहरी, सशस्त्र प्रहरी र राष्ट्रिय अनुसन्धान विभागलाई विप्लवका गतिविधि नियन्त्रण गर्न सर्कुलर जारी गरेको छ। सरकारको यो निर्णयअघि सुरक्षा निकायले विप्लवको प्रभाव र रणनीतिबारे विश्लेषणसहितको प्रतिवेदन तयार गरेर सरकारलाई बुझाएको थियो । 

गत साता नेपाली सेनाले आन्तरिक सुरक्षामा विप्लव नेकपाको समूह गतिविधि थ्रेट हुनसक्‍ने विश्लेषण गरेका थियो  । सेना दिवसको अवसर पारेर जंगीअड्डामा हालै आयोजित जर्नेल सम्मेलनमा उनीहरूले तराईमा सिके राउत र पहाडी इलाकामा विप्लव नेकपाको भौतिक र मनोवैज्ञानिक दुवै प्रभाव बढ्दै गएको भन्दै नेतृत्वको ध्यानाकर्षण गरेका थिए। 

नेपाल प्रहरीका प्रवक्ता एसएसपी उत्तम सुवेदीले विप्लव समूहका हरेक गतिविधिमाथि निगरानी बढाएको जानकारी दिए । उनले भने, ‘सो समूहका नाममा हुने कुनै पनि सभा, सम्मेलनजस्ता गतिविधिमाथि निगरानी बढाइएको छ ।’ पछिल्लो समयमा राजधानीको नख्खुस्थित एनसेलको कार्यालय, बसुन्धरालगायतका ठाउँमा विप्लव समूहले बम विस्फोट गराएको थियो । 

साथै विभिन्न ठाउँमा धम्की, चन्दा आतंक र लुटपाट मच्चाएपछि सरकारले विप्लव समूहमाथि निगरानी बढाएको थियो । विप्लव नेतृत्वको नेकपाले पार्टीको गतिविधिमाथि प्रतिबन्ध लगाएर सरकारले तानाशाही प्रवृत्ति देखाएको आरोप लगाएको छ । उक्त पार्टीले सरकारी प्रतिबन्धको प्रतिकार गर्ने चेतावनी दिएको छ ।