बन्दसँगै ठाउँ ठाउँमा बम : स्थानीय त्रसित

काठमाडौं- नेत्रविक्रम चन्द विप्लव नेतृत्वको समुहले बन्दसँगै ठाउँ ठाउँमा बम राखेर स्थानीयलाई त्रसित बनाएको छ । 

सरकारले प्रतिबन्धको घोषणा गरेसँगै आक्रामक बनेको विप्लव नेतृत्वको समुहले कैलाली, पोखरा, गोरखा, नवलपरासी, मकवानपुर, रौतहटलगायतका विभिन्न ठाउँमा बम राखेको भेटिएको छ । ठाउँ ठाउँमा बम भेटिन थालेपछि स्थानीय नागरिकहरु त्रसित देखिन थालेका छन् । आवत जावत गर्न समेत डराउन थालेका छन् । 

बिहीबार नेपाल बन्दको आह्वान गरेको विप्लव समुहले राखेको बमका कारण महेन्द्रराजमार्ग अन्तर्गत नारायणगढ–बुटवल खण्डको आवतजावत नै प्रभावित भएको छ । जयश्री पुलमा शंकास्पद वस्तु भेटिएपछि यात्रुहरु त्रसित भएका छन् ।

यस्तै गोरखा जिल्लामा २ ठाउँमा प्रेसर कुकर बम भेटिएको छ । गोरखा सदरमुकामबाट गोरखा क्याम्पस जाने बाटोमा पर्ने भीआईपी टोल र गोरखा सदरमुकामको १२ किलो बजार नजिकै आँबुखैरेनी बजार नजिकै बिहीबार बिहान २ वटा बम भेटिएको प्रहरीले जनाएको छ ।
 
त्यस्तै पोखराको सभागृह चोकमा रहेको ट्राफिक बिटमा पनि बम फेला परेको छ । बिहान भेटिएको बम नेपाली सेनाको टोलीले डिस्पोज गरेको  छ। बम विप्लव नेतृत्वको नेकपाका कार्यकर्ताले राखेको प्रहरीको अनुमान छ।

यसैगरी रौतहटको गौर चन्द्रनिगहापुरा सडक खण्डअन्तर्गत पर्ने हरसाहमा बम भेटिएको छ । यस्तै मकवानपुरको हेटौडा औद्योगिक क्षेत्रको मुल गेटमा पनि बम फेला परेको छ । दुबै ठाउँमा भेटिएकाे बम नेपाली सेनाको बम डिस्पोजल टोलीले  निस्कृय बनाएको छ ।

यस्तै कैलालीका दुई स्थानमा शंकास्पद वस्तु फेला परेको छ। जिल्ला प्रहरी कार्यालयका अनुसार कैलालीको जोशिपुर गाउँपालिका वडा नम्बर ५,६,७  को वडा कार्यालय अगाडी र घोडाघोडी नगरपालिकाको साडेपानीमा शंकास्पद वस्तु फेला परेका हुन्।