साफ महिला फुटबलको तयारी पूरा, प्रचण्डले उद्घाटन गर्ने

काठमाडौं- विराटनगरमा मंगलबारदेखि शुरु हुने पाँचौ साफ महिला च्याम्पियनसीप फुटबल प्रतियोगिताको तयारी पूरा भएको छ । इतिहासमै पहिलो पटक मोफसलमा हुन लागेको पाँचौ साफ महिला फुटबल प्रतियोगिताको सबै तयारी पूरा भएको अखिल नेपाल फूटबल संघ (एन्फा)का प्रवक्ता तथा प्रचार प्रसार समिति संयोजक किरण राईले जानकारी दिए । 

प्रतियोगिताको उद्घाटन नेकपाका अध्यक्ष पुष्पकमल दाहाल (प्रचण्ड)ले गर्ने राईले जानकारी दिए । उद्घाट्न खेलमा नेपालले भुटानको समान गर्दै छ । खेल शहिद रंगशालामा नेपाली समय अनुसार दिउँसो २ बजेबाट सुरु हुने छ । 

प्रतियोगिता सञ्चालनका लागि विराटनगर महानगरपालिकाले एक करोड र प्रदेश सरकारले ५० लाख सहयोग गरेको छ । साफ महिला फुटबल प्रतियोगिता सञ्चालन हुने शहीद रंगशालाको रङ्गरोगन, महिलामैत्री रंगशाला, चेञ्जिङ रुम, महिलामैत्री शौचालय, खेलाडी, प्रशिक्षक बस्ने स्थान लगायतका सम्पूर्णकार्य सम्पन्न भएको राईले जानकारी दिए । 

संयोजक राईले विदेशी खेलाडीले अभ्यास गर्ने खेल मैदान विराटनगरको जुट मिल तथा दिल्ली पब्लिक स्कुल विराटनगर र सुनसरी दुहबीको खेल मैदानको स्तरोन्नति तथा व्यवस्थापन लगायतको सबै तयारी पूरा भएकोसमेत बताए । एन्फका अध्यक्ष कर्माछिरिङ शेर्पाले विराटनगरमा भएको खेल मैदान अन्तर्राष्ट्रियस्तरको रहेको र आवश्यक सम्पूर्ण सुविधा खेलाडीलाई उपलब्ध गराइने बताए ।