वाल्मीकिमा रामगोपालको साथमा रचना वाचन

काठमाडौं – ‘निरन्तर शनिबार’ कार्यक्रम वाल्मीकि क्याम्पसमा सम्पन्न भएको छ। साहित्यको विकासका लागि सक्रिय युवाहरुको समूले प्रत्यक शनिबार आयोजना गर्दै आएको उक्त कार्यक्रममा आज कवि रामगोपाल आशुतोष प्रमुख अतिथिका रुपमा रहेका थिए।

उनले युवाहरुको यो प्रयासले साहित्यको विकासमा ठुलो योगदान पुग्ने बताएका थिए । आशुतोषले आफू कुनै एउटा विचारमा बाँधिएर मात्र कविता नलेख्ने नभई आफ्नो सभ्यता, संस्कृति र स्थानीयताको नजिक रहेर लेख्ने गरेको बताएका थिए। वीपीको विचारबाट आफू प्रभावित भएको भन्दै  अरुमाथि अत्याचार गर्ने र उत्पीडनका विरुद्ध बोल्न नसक्ने कोही पनि प्रजातन्त्रवादी हुन नसक्ने जिकिर गरे।

कार्यक्रममा उनले ‘अर्गानिक प्रेम प्रस्ताव’, ‘शब्दहरु ए शब्दहरु’, ‘डाइपर युग र मान्छे’, ‘एक्लो उपत्यका’, ‘इतिहास नजान्नेलाई’, ‘भोकको रामायण’ र ‘फर्सीको जरा’ गरी सात वटा कविता सुनाएका थिए। कार्यक्रममा पूर्णिमा प्रतिविम्ब,  सुदर्शन शर्मा, राम अविरल बिस्ट, नवीन चिराग, सरोज राई, कविन्द्रलाल प्रधान, स्मिता श्रेष्ठ, रमेश बलामी, यामप्रसाद आचार्य, ऋचा, समाश्री, दलवीरसिंह बराइली, सोझो गाउँलेलगायतले रचना बाचन गरेका थिए।