हामी बुद्धका सन्तान, हाम्रो रगतमा अहिंसा छ : सिके राउत

काठमाडौं- तराई मधेसलाई नेपालबाट अलग गराउनुपर्छ भन्ने माग राख्दै आएका सिके राउतले हामी सबै नेपाली बुद्धका सन्तान भएकाले सबैको रगतमा अहिंसा रहेको बताएका छन्। सरकार र राउन पक्षबीच शुक्रबार भएको ११ बुँदे सहमति घोषणा सभामा सम्बोधन गर्दै राउतले भने, ‘हामी बुद्धका सन्तान हो। अहिंसा हाम्रो रगतमा बसेको छ। कसैले सिकाउनै पर्दैन। तराई पहाड जहाँ पनि अहिंसा हुनुपर्छ । बुद्ध र गान्धीको आदर्शबाट हामी अगाडि बढेका छौँ।’

आफूहरूको आन्दोलन कुनै पनि बेला विस्फोट लिने डर रहेको भन्दै उनले यसलाई शान्तिपूर्ण रुपमा अवतरण गराउन प्रधानमन्त्री केपी शर्मा ओलीले खेलेको भूमिकाको प्रशंसा गरे। उनले भने, ‘उहाँले हाम्रो आन्दोलनलाई कदर गर्नुभयो। यसलाई राजनीतिक स्पेस दिनुभयो।’ साथै उनले पूर्वप्रधानमन्त्रीहरू शेरबहादुर देउवा, पुष्पकमल दाहाल, बाबुराम भट्टराई, सुशील कोइरालालाई पनि आफ्नो आन्दोलनलाई सकारात्मक रुपमा लिएको भन्दै धन्यवाद दिएका छन्। उनले समुदाय–समुदाय र जातजातिबीच लडाउने तत्त्वलाई कुनै पनि प्रकारको स्पेस नरहेको उनले बताए।