आज नारी दिवस : कसले शुभकामनामा के भने ? 

काठमाडौं- आज १०९ औं अन्तर्राष्ट्रिय नारी दिवस । लैङ्गिक समानताका लागि समान सोंच र व्यवहार  समृद्धिको आधार’ भन्ने नारासहित नेपालमा पनि विभिन्न कार्यक्रम गरी मनाईदैछ । 

काठमाडौं उपत्यका लगायत देशका अधिकांश ठाउँमा विविध कार्यक्रम गरिएको छ । विभिन्न ठाउँमा सचेतना र्याली निकालिएको छ । दिवसका अवसरमा राष्ट्रप्रमुख, सरकार प्रमुख र राजनीतिक दलका शीर्ष नेताले शुभकामना दिएका छन् ।

शुभकाना दिदैँ राष्ट्रपति विद्यादेवी भण्डारीले महिलाविरुद्ध हुने सबै प्रकारका विभेद र उत्पीडनको अन्त्य गर्ने काममा आआफ्नो क्षेत्रबाट अग्रसर हुन सबैमा आग्रह गरेकी छिन् । उनले सबै महिलाको हकअधिकार, समानता, सशक्तीकरण तथा मानव अधिकारप्रति पूर्ण समवेदनशील भइरहन प्रेरणा मिलोस् भनी कामना गरेकी छिन् । 

उपराष्ट्रपति नन्दबहादुर पुनले संविधानप्रदत्त महिला अधिकारको कार्यान्वयन गर्दै महिलाको सर्वाङ्गीण विकासका लागि सबै क्षेत्रको ध्यान जानुपर्ने बताएका छन् । । नारी दिवसको शुभकामना व्यक्त गर्दै उनले महिला राजनीतिक, सामाजिक तथा आर्थिक रुपमा स्वतन्त्र र सशक्त नभएसम्म ‘समृद्ध नेपाल, सुखी नेपाली’ सम्भव नभएको उल्लेख गरेका छन् । 

प्रधानमन्त्री केपी शर्मा ओलीले महिलाको आर्थिक तथा सामाजिक सशक्तीकरणमार्फत् सारभूत समानतासहितको समतामूलक समाजको निर्माण गरी समृद्धिको यात्रामा अघि बढ्न सबैलाई प्रेरणा प्रदान गरोस् भन्ने कामना गरेका छन्। 

उनले समानताको सोचलाई प्रवद्र्धन गर्दै महिलाको राजनीतिक, आर्थिक सामाजिक तथा सांस्कृतिक अधिकार सुनिश्चित गर्न आफ्नो जीवनअर्पण गर्नुहुने सम्पूर्ण श्रद्धेय व्यक्तित्वको स्मरण गरेका छन् ।  

प्रधानमन्त्री ओलीले समाजमा विद्यमान दाइजो प्रथा, बोक्सीको नाममा हुने ज्यादति, छाउपडीजस्ता कूरीतिका साथै यौन दुव्यर्वहार र हिंसाका घटनाले नारीको सम्मान गर्ने हाम्रो मौलिक सभ्यतालाई चुनौति दिइरहेको सन्देशमा उल्लेख गरेका छन् । यसका विरुद्ध एकजुट भए लाग्नु पर्नेमा उनको जोड छ । 

यस्तै प्रतिनिधिसभाका सभामुख कृष्णबहादुर महरा, राष्ट्रियसभाका अध्यक्ष गणेशप्रसाद तिमिल्सिनालगायतले पनि नारी दिवसको शुभकामना दिएका छन् । नेकपाका अध्यक्ष पुष्पकमल दाहाल प्रचण्ड पनि शुभकामना दिदै नारी शक्तिको सम्मान सबैले गर्नु पर्नेमा जोड दिएका छन् । 

त्यस्तै नेपाली काङ्ग्रेसका सभापति एवम् पूर्वप्रधानमन्त्री शेरबहादुर देउवाले मुलुक अहिले पनि महिलामाथि हुने विभेद र हिंसाका घटनाबाट मुक्त हुन नसकेको र शहरदेखि गाउँमा महिला शोषण, दमन र उत्पीडनबाट आक्रान्त रहेकाले यसबाट छुटकारा दिलाउन सबै एकजुट हुन पर्नेमा जोड दिएका छन् । एक सन्देश जारी गर्दे उनले  महिलाविरुद्ध हुने सबैखाले हिंसाको अन्त्यका लागि आम नागरिकलाई जागरुक गराउन दिवसले सहयोग पु¥याउने विश्वास ब्यक्त गरेका छन् ।