प्रधानमन्त्री चढेकाे जहाज होल्डबारे छानबिन हुँदै

काठमाडौं - संस्कृति, पर्यटन तथा नागरिक उड्डयन मन्त्रालयले प्रधानमन्त्री केपी शर्मा ओली चढेको विमान आकाशमा होल्ड गरिएकोबारे छानबिन सुरु गरेको छ। मन्त्रालयका सहसचिव सुरेश आचार्यको संयोजकत्वमा गठित समितिलाई छानबिनको जिम्मेवारी दिइएको छ।

प्रधानमन्त्री ओली चढेको यती एयरको एटिआर विमान गत मंगलबार झापाबाट फर्कने क्रममा विमानस्थलमा एयर ट्राफिक समस्या भएपछि केहिबेर आकाशमै होल्ड भएको थियो। यती एयरलाइन्सको सो विमानले काठमाडौंको आकाशमा ३ चक्कर लगाएको थियो।

जहाजका यात्रु ‘भिभिआइपी’ रहेको जानकारी हुँदासमेत जहाजलाई किन होल्ड गरियो भन्नेबारे छानबिन गरिने भएको छ। कुनै पनि जहाजमा ‘भिभिआइपी’ यात्रु रहेको अवस्थामा कुनै विशेष अवस्थामा वा सुरक्षा खतराविना जहाजलाई होल्ड वा डाइभर्ट गर्न मिल्दैन। बिरामी परेका प्रधानमन्त्री ओली चढेको जहाज होल्ड गर्नुको कारणबारे समितिले सत्यतथ्य छानबिन गरी दोषी देखिएमा कडा कारबाही गर्ने नागरिक उड्डयन मन्त्रालयले जनाएको छ।