डा.केसी भन्छन् : 'सरकारको कार्यशैली लुटतन्त्र र दण्डहीनता'

काठमाडाै‌ं - डा. गोविन्द केसीले अहिलेको सरकारको कार्यशैली लुटतन्त्र र दण्डहीनता भएको आरोप लगाएका छन्। बिहीबार त्रिवि शिक्षण अस्पतालमा आयोजित पत्रकार सम्मेलनमा उनले भने, 'भ्रष्टहरुलाई उन्मुक्ति र पुरस्कार दिइने यही लुटतन्त्र र दण्डहीनता नै अहिलेको सरकारको कार्यशैली बनेको छ।' भ्रस्टाचार र अपराधलाई नियन्त्रण गर्नुको सट्टा सरकार नागरिकको अभिव्यक्ति स्वतन्त्रतामा अनेक अंकुश लगाउने र विरोधका आवाजहरुलाई दबाउने अभ्यासमा सक्रिय बनेको उनको आरोप छ।

डा. केसीले मेडिकल माफिया र कालो बजारी गर्ने निजी मेडिकल कलेजमाथि तत्काल कानुन बमोजिम कारबाही गर्न चेतावनी दिए। एमबीबीएस, बीडीएस र नर्सिङ् लगायतका कार्यक्रमहरुमा निजी मेडिकल कलेजहरुले अर्बौंको कालो बजारी गरेको उनकाे आरोप छ।

डा. केसीले आन्दोलनरत गण्डकी मेडिकल कलेजका विद्यार्थीहरुको माग तत्काल सम्बोधन गर्दै नाजायज रुपमा असुलिएको अवैध रकम तत्काल व्याजसहित फिर्ता गराउन माग गरेका छन्। उनले किस्टलगायत अन्य मेडिकल कलेजहरुमासमेत यस्तै ठगी भइरहेकाले दोषी उपर कडा कारबाहीको माग गरे। डा. केसीले माफियाको स्वार्थमा पारित गरिएको राष्ट्रिय चिकित्सा शिक्षा विधेयकसमेत संसोधनको माग गरेका छन्। उनले आफूसँग भएका सम्झौताहरु यथासिघ्र कार्यान्वयन गर्न सरकारको ध्यानाकर्षण गराए।

डा. केसीले दुई तिहाईको सरकार माफियाको स्वार्थमा लागेर काम गरिरहेको आरोप लगाए। 'सरकार र सत्तारूढ़ दलले देखाएको रवैयाले यो सरकार स्वास्थ्य र शिक्षामा गुणस्तर र पहुँच हैन आफ्ना आसेपासेहरुको  व्यापारिक स्वार्थ र नफाखोरी सुनिश्चित गर्न लागीपरेको प्रमाणित भएको छ।', डा. केसीले भने।