गृहमन्‍त्री नै भन्‍छन्- प्रहरीको लापरबाहीले निर्मला हत्या जटिल

धनगढी- गृहमन्त्री रामबहादुर थापा वादलले प्रहरीको लापरबाहीका कारण निर्मला पन्तको हत्यारा पत्ता लगाउन समस्या भएको स्विकार गरेका छन् । 

मन्त्री थापाले कैलालीको धनगढी पुगेर प्रहरीले नै प्रमाण नष्ट गरिदिदा अनुसन्धानमा समस्या भएको र, अपराधि पक्राउ गर्न असहज भएको स्विकार गरेका हुन् । घट्ना हुदाका बखत कंचनपुरमा रहेका सुरक्षाकर्मीले लापरवाही गर्दा घट्ना जटिल मोडमा पुगेको उनको भनाई थियो । 

बुधवार धनगढीमा पत्रकार संग कुरागर्दै थापाले उक्त घट्नाको सूक्ष्म ढंगले अनुसन्धान भैरहेकोले चाडै हत्यारा पत्ता लाग्ने दाबी गरे । घट्नाको अनुसन्धानका लागि प्रहरीको छुट्टै टोली नै कंचनपुरमा खटिएको भन्दै थापाले चाडै घट्नाको सत्यतथ्य बाहिर आउने जिकीर गरे । हत्यारा जो सुकै भएपनि कडा कारबाही गर्ने उनको भनाइ थियो । 

प्रदेश स्तरीय सुरक्षा गोष्ठीमा सहभागी हुन धनगढी पुगेका गृहमन्त्री थापाले सिन्डिकेट कानुनी रुपमा निस्तेज भैसकेको र व्यवहारिक रुपमा केही वाकी रहेपनि चाडै निर्मुल पार्ने बताए । सिन्डिकेटका कारण नागरिकले दुःख पाउने अवस्थाको अन्त्य गर्ने उनको भनाइ छ । 

पाटी एकीकरण कार्यदलका संयोजक समेत रहेका थापाले ठूला दुई पार्टी एक हुँदा स्वभाविक रुपमा केही समय लाग्ने भन्दै चाडै एकता टुंगोमा पुग्ने बताए । सुदूरपश्चिम प्रदेशको सुरक्षा रणनीति तय गर्न धनगढीमा दुई दिनदेखि गोष्ठि चलिरहेको छ ।