महाशिवरात्रिमा योग र ध्यान

काठमाडौं- ध्यान साधक र योग गुरुहरुको अगुवाइमा राजधानीमा योग र ध्यानको अध्यास गरी महाशिवरात्रि पर्व मनाइएको छ ।

ठमेलस्थित डिभाइन योग स्टुडियो उद्घाटन समारोहमा साधकहरुले विभिन्न व्यक्तित्वहरुलाई ध्यान र योग गराएका  थिए । कार्यक्रमका वक्ताहरूले योग र ध्यानको महत्त्वमाथि प्रकाश पारे ।

योग प्रशिक्षक मोदनाथ खनालले योग र योगा शब्दबारे स्पष्ट हुन नसकेमा साधना पूर्ण हुन नसक्ने बताए । उनले संस्कृत भाषामा रहेको योग र योगसूत्रलाई अंग्रेजीकरण गर्न नहुने बताए । उनले भने, ‘योगमा सबै विद्या छ । तर अहिले यसलाई बजारीकरण मात्र गर्न खोजिएको छ । योगसूत्र नबुझी यसलाई आधार नबनाई योग हुन सक्दैन ।’ 

उनले अनुशासन, यम, नियमबारे जानकारी लिई मन शुद्धीकरण नभई योग गर्न नसकिने बताए । उनले भने, ‘योग भनेको जीवात्मा र परमात्मा जोड्ने तत्त्व हो । त्यसैले अहिंसावादी र सत्यवादी भएर मात्र योग गर्न सकिन्छ ।’ कार्यक्रममा योगगुरु प्रेम आलोकले योग र ध्यानका विभिन्न पक्षमाथि चर्चा गरेका थिए । अर्का योगगुरु शान्त खरेलले योगले व्यक्तिको मन र शरीर शुद्ध मात्र नबनाई आत्मालाई परामात्मासँग जोड्ने बताए ।

नेपालमा योगको सही प्रयोग हुन नसकेपछि यसलाई प्राकृतिक वातावरणमा सिकाउन स्टुडियो सञ्चालनमा ल्याइएको सञ्चालक राजकुमार कार्कीले जानकारी दिए । स्टुडियोले राजधानीका विद्यालयमा गएर बालबालिकालाई योग सिकाउने लक्ष्य लिएको छ ।