ग्यासको अभाव सुरु, निगम भन्छ- 'अभाव हुँदैन'

काठमाडौं- बजारमा ग्यासको अभाव सुरु भैसके पनि नेपाल आयल निगम र ग्यास उद्योगीहरुले बजारमा ग्यासको अभाव नहुने दावी गरेका छन् । उद्योगहरुमा पर्याप्त खाना पकाउने ग्यास स्टक रहेकाले बजारमा अभाव नहुने उनीहरुको जिकीर छ । 

कमिसन वृद्धिलगायत १० बुँदे माग रोखर ग्यास उद्योगीले शुक्रबारबाट ग्यास ल्याउने अनुमति (प्रोगेक्ट डेलीभरी अर्डर–पिडिओ) नउठाएपछि ग्यास अभाव हुन सक्ने आशंकामा उपभोक्ताले खाली सिलिन्डर भर्न थालेपछि उद्योगी र निगमले यस्तो आग्रह गरेका हुन् ।

निगम र उद्योगी दुबैले हल्लाका पछि नलाग्न पनि उपभोक्तासँग आग्रह गरेका छन् । तर, बजारमा ग्यासको अभाव हुने खबर आएसँगै ग्यास भर्नेको चाप बढेको छ भने व्यापारीहरुले ग्यास लुकाउन थालेका छन् । जसले गर्दा बजारमा ग्यासको अभाव सुरु भएको छ ।

सामान्य अवस्थामा जस्तै अहिले पनि दैनिक एक लाख सिलिन्डर ग्यास बजारमा पठाइरहेकाले अभाव नहुने निगम र उद्योगीले स्पष्ट पारेका हुन् । शुक्रबारदेखि पिडिओ नउठाए पनि पुरानो पिडिओको आधारमा सोमबार पनि ग्यास बुलेटले इन्डियन आयल कर्पोरेसन (आइओसी) को बरौनी, मथुरा, हल्दियालगायत रिफाइनरीबाट ग्यास लोड गरेको निगमले जनाएको छ ।