आज सेना दिवस, प्रधानमन्त्रीले दिए यस्तो सन्देश

काठमाडौं- नेपाली सेनाले महाशिवरात्रिका अवसरमा आज सेना दिवस मनाउँदै छ । सैनिक मञ्च टुँडिखेलमा विशेष कार्यक्रमको आयोजना गरिएको छ भने देशैभर विविध कार्यक्रमको आयोजना गरेर नेपाली सेनाले दिवस मनाउँदै छ ।  

राष्ट्रपति विद्यादेवी भण्डारीको प्रमख आतिथ्यतामा सेनाले टुडिखेलमा विशेष समारोह आयोजन गर्दैछ । समारोहमा सैनिक सामग्री तथा कला प्रदर्शनी, परेड, प्यारा जम्प, कवाज तथा तोप बढाइँ गरिनेछ । सेना दिवसको कार्यक्रमलाई नेपाली सेनाको शक्ति प्रदर्शनको रुपमासमेत हेरिन्छ ।

यसैबीच सेना दिवसका अवसरमा शुभकामना सन्देश दिँदै प्रधानमन्त्री ओली केपी ओलीले नेपाली सेना दिवस सेनाको मात्र नभई सम्पुर्ण नेपाली र राष्ट्रकै दिवस रहेको बताएका छन् । उनले नेपाली सेनाको व्यावसायीक क्षमता वृद्धि गर्न सरकारले आवश्यक पहल कदमी लिने समेत बताएका छन् । 

देश समृद्ध नेपाल,सुखी नेपालीको राष्ट्रिय लक्ष्यका साथ अघि बढीरहेकोले सेनाले पनि त्यसै मर्म अनुसार काम गर्न अग्रसर हुनुपर्ने प्रधानमन्त्रीको सन्देशमा उल्लेख छ । सेनाले विगतमा झैं आउने दिनमा पनि सरकारले सुम्पिएका निर्माण कार्यलगायतका जिम्मेवारीहरु कूशलतापूर्वक सम्पन्न गर्ने उनको विश्वास छ ।