सर्लाहीमा गोली हानी यादवको हत्या

जनकपुरधाम- अज्ञात समूहले गोली हानेर सर्लाहीमा एक युवकको हत्या गरेको छ । अज्ञात समूहले मलंगवा नगरपालिका–२ बस्ने अन्दाजी ३० वर्षीय मनोजकुमार यादवको गोली हानेर हत्या गरेको छ ।

मनोजको शरीरमा पाँच राउण्ड गोली हानिएको प्रदेश २ का प्रहरी प्रमुख डीआईजी हरिबहादुर पालले जानकारी दिएका छन् । मलंगवा–८ शीतभण्डार नजिक आइतबार बिहान गोली लागेको अवस्थामा मनोजको शव फेला परेको पालले बताए । घटनास्थलमा गोलीको खोका पाँच थान र एक राउण्ड गोली फेला परेको पालले जानकारी दिएका छन् । 

हत्या गरिएका मनोज लागुऔषध दुव्र्यसनीमा संलग्न रहेको प्रहरीको प्रारम्भिक अनुसन्धानबाट खुलेको छ । ‘घटनाबारे जानकारी पाएलगत्तै हामीले अनुसन्धान शुरु गरेका छौं,’ डीआजी पालले भने,‘उनीहरुको चार पाँचजनाको समूह रहेको प्रारम्भिक अनुसन्धानबाट खुलेको छ । सोही समूह मध्ये कोही घटनामा संलग्न भएको हुन सक्ने हाम्रो अनुमान छ ।’ अपराधी जो सुकै भएपनि छिट्टै नियन्त्रणमा आउने पालले बताएका छन् ।

शंकास्पद व्यक्तिहरुको खोजी कार्य जारी रहेको बताउँदै घटनाबारे थप अनुसन्धान भइरहेको डीआईजी पालले जानकारी दिएका छन् ।
शनिबार राती ९ बजे मनोज घरमा भएको बेला एक व्यक्तिले फोन गरेर बोलाएपछि उनी बाहिर निस्केको परिवारका सदस्यहरुले बताएका छन् ।