वामदेवले भने- 'म रवीन्द्रको क्षेत्रबाट चुनाव लड्दिन'

काठमडौं- नेपाल कम्युनिष्ट पार्टी (नेकपा)का सचिवालय सदस्य वामदेव गौतमले आफू कुनै पनि हालतमा रवीन्द्र अधिकारीको निर्वाचन क्षेत्रबाट चुनाव नड्ने स्पष्ट पारेका छन् । 

सामाजिक सञ्जाल फेसबुकमा स्टासस लेख्दै उनले आफु अधिकारीको निधनपछि खाली भएको निर्वाचन क्षेत्रबाट चुनाव लड्ने इच्छा नभएको र पार्टी निर्णय गरेपनि स्विकार नगर्ने बताएका हुन् ।अधिकारीको हेलिकोप्टर दुर्घटनामा परि निधन भएसँगै खाली भएको कास्की क्षेत्र नम्बर २ मा नेता गौतम उठ्ने चर्चा चलेको थियो । 

उनले फेसबुकमा श्रद्धान्जली दिन पोखरा पुगेको घटनालाई आधार बनाएर उम्मेदवार बन्ने लालस देखाएको आरोप लगाएको भन्दै आपत्ति जनाएका छन् । आफ्नो चरित्र हत्या गर्ने निकृष्ट र षडयन्त्रमूलक विचार राखेर कुप्रचार गरिएको उनको टिप्पणी छ । 

मृत्यु शोकमा पाइला टेकेर व्यक्तिगत स्वार्थ पुरा गर्ने विचारलाई आफूले कहिल्यै मान्यता नदिएको नेता गौतमले उल्लेख गरेको छन् । उनले आफू अधिकारीकै परिवारका सदस्यलाई उम्मेदवार बनाउने पक्षमा रहेको र त्यसका लागि प्रयत्न गर्ने बताएका छन् ।