पूर्वअर्थमन्त्री अधिकारीको भेन्टिलेटरमा राखेर उपचार गरिँदै 

काठमाडौं – लामो समयदेखि श्‍वासप्रश्‍वास समस्याबाट पीडित पूर्वअर्थमन्त्री भरतमोहन अधिकारीको स्वास्थ्य अवस्था थप जटिल बनेको छ। अधिकारीको धुमबाराहीस्थित ह्याम्स अस्पतालमा आइसियुमा उपचार भइरहेको छ। 

अधिकारीलाई भेट्न पुगेका सांसद सोम प्रसाद पाण्डेका अनुसार ८२ वर्षीय अधिकारीको मुटु र फोक्सो र मृगौलामा समस्या देखिएको छ। उनले अचेत अवस्थामा भेन्टिलेटरमा राखेर अधिकारीको उपचार भइरहेको जानकारी दिएका छन्। 

अधिकारीलाई भेट्न पूर्वप्रधानमन्त्री एवम् नयाँ शक्ति नेपालका संयोजक बाबुराम भट्टराई पनि अस्पताल पुगेका छन्। भट्टराईले अस्पताल पुगेर अधिकारीको स्वास्थ्य अवस्थाको बारेमा जानकारी लिएका थिए। 

अधिकारी श्‍वासप्रश्‍वासमा समस्या देखिएपछि भैसेपाटीस्थित मेडोसिटी हस्पिटलमा उपचाररत थिए। त्यहाँ सञ्चो नभएपछि उनलाई ह्याम्समा ल्याइएको हो।