मन्‍त्री अधिकारी : जसले यस्तो चर्चित गीत लेखेका थिए 

काठमाडाैं- ताप्लेजुङमा भएको हेलिकप्टर दुर्घटनामा परि ज्यान गुमाएका पर्यटनमन्त्री रवीन्द्र अधिकारीलाई धेरैले एउटा राजनीतिककर्मीका रुपमा चिन्छन् । 

मन्त्री अधिकारी राजनीतिकर्मी मात्रै होइनन् । उनी साहित्यमा पनि उत्ति नै सक्रिय थिए । उनले 'समृद्ध नेपाल' र द 'रोड टु प्रस्पर्टी' नामक पुस्तक प्रकाशन गरेका छन् । उनले खासगरी मुलुकको विकासको सम्भाव्यताबारे लेख्ने गरेका थिए । 

उनै मन्त्री अधिकारीले एउटा चर्चित गीत पनि लेखेका छन् । जुन तपाईंले धेरै पटक सुन्नुभएको थियो होला । 'जोमसोमै बजारमा १२ बजे हावा सररर...' । नेपथ्य ब्यान्डले गाएको यो गीत एक समय निकै चर्चित थियो । आज पनि धेरैले गुनगुनाउने गरेका छन् । 



आज पनि जोमसोममा १२ बजे हावा चल्छ । तर रवीन्द्र कहिल्यै नचल्ने गरी बिदा भएका छन् । त्यो डाँडा ढाक्यो कुहिरोले भनेर गीतमा लेखेका उनको त्यही कुहिरो हेलिकप्टरले छल्न नसक्दा जीवनलीला समाप्त भएको छ । 

बुधबार ताप्लेजुङको पाथीभरा मन्दिर दर्शन गरेर फर्किने क्रममा उनको हेलिकप्टर दुर्घटना भएर उनीसहित ७ जनाको मृत्यु भएको हो ।