विदेशी स्टारमाथि भारी नेपाली बलर, एनपीएलमा धमाकेदार सुरुवात

काठमाडौं- नेपाल प्रिमियर लिग (एनपीएल) को तेस्रो संस्करणमा नेपाली युवा बलरहरूले प्रभावशाली प्रदर्शन गर्दै प्रतियोगितामा सनसनीपूर्ण सुरुवात गरेका छन्। सुरुवाती खेलहरूमा नेपाली बलरले विदेशी खेलाडी सम्मिलित टोलीका ब्याट्सम्यानलाई दबाबमा राख्दै उत्कृष्ट बलिङ गरेका छन्।

जनकपुर बोल्ट्सका राहुल यादव, कर्णाली याक्सका उनिश विक्रम ठकुरी, चितवन राइनोजका कमल सिंह ऐरी तथा लुम्बिनी लायन्सका किशोर महतो र शेर मल्लले आफ्नो प्रदर्शनबाट ध्यान खिचेका छन्।

जनकपुर बोल्ट्सका राहुल यादवले कर्णाली याक्सविरुद्ध कसिलो बलिङ गर्दै चार ओभरमा १५ रन मात्र दिएर दुई विकेट लिए। कम रन खर्चेर विकेट लिने उनको प्रदर्शनले कर्णालीका ब्याट्सम्यानलाई दबाबमा राख्न मद्दत गरेको थियो। यस्तै, कर्णाली याक्सका उनिश विक्रम ठकुरीले जनकपुरविरुद्ध उत्कृष्ट बलिङ गर्दै चार ओभरमा एक मेडनसहित २२ रन दिएर तीन विकेट लिए। उनको प्रदर्शन कर्णालीको जितको आधार बनेको थियो। उनिशले विपक्षी टोलीका ब्याट्सम्यानलाई खुलेर खेल्न नदिँदा जनकपुरको ब्याटिङ प्रभावित भएको थियो।

चितवन राइनोजका कमल सिंह ऐरीले विराटनगर किंग्सविरुद्ध घातक बलिङ गर्दै चार ओभरमा २६ रन दिएर चार विकेट लिए। उनको उत्कृष्ट प्रदर्शनले चितवनलाई जित दिलाउन महत्त्वपूर्ण भूमिका खेल्यो। चार विकेट लिने क्रममा कमलले विपक्षी टोलीका प्रमुख ब्याट्सम्यानलाई पवेलियन फर्काएका थिए। कमलले विराटनगरका आन्द्रे रसेल, एन्जेलो म्याथ्युज, रुपेश सिंह र बसिर अहमदलाई आउट गरेका थिए। 

त्यसैगरी, प्रतियोगिताको उद्घाटन खेलमा पनि नेपाली बलरले प्रभावशाली प्रदर्शन गरेका थिए। लुम्बिनी लायन्सका किशोर महतोले सुदूरपश्चिम रोयल्सविरुद्ध चार ओभरमा २२ रन दिएर चार विकेट लिएका थिए। लुम्बिनीकै शेर मल्लले चार ओभरमा ११ रन मात्र खर्चेर तीन विकेट लिए। उनीहरूको कसिलो बलिङले सुदूरपश्चिमको ब्याटिङमा दबाब सिर्जना गरेको थियो। उता सुदूरपश्चिम रोयल्सका अनिल खरेलले लुम्बिनीविरुद्ध दुई ओभरमा नौ रन दिएर दुई विकेट लिएका थिए।

एनपीएलको सुरुवाती प्रदर्शनले नेपाली बलरहरू विदेशी खेलाडीसँग प्रतिस्पर्धा गर्न सक्षम रहेको देखाएको, जुन नेपाली क्रिकेटका लागि निकै राम्रो संकेत देखिएको छ। राहुल, उनिश, कमल, किशोर र शेरको प्रदर्शनले नेपाली क्रिकेटमा बलिङतर्फ नयाँ सम्भावना देखाएको छ। विशेषगरी कम रन खर्चेर महत्त्वपूर्ण विकेट लिने र विपक्षी टोलीको ब्याटिङ क्रमलाई दबाबमा राख्ने उनीहरूको क्षमताले प्रतियोगितालाई थप प्रतिस्पर्धात्मक बनाएको छ।