नेपाल हिरो गोल्डकपको उपविजेता 

काठमाडौं- नेपाली महिला राष्ट्रिय फुटबल टोली भारतमा भएको हिरो महिला फुटबलमा उपविजेत बनेको छ । म्यानमारसँगको फाइनल खेलमा ३-१ गेल अन्तरले पराजित हुँदै नेपाल प्रतियोगिताको उपविजेता बनेको हो । 

पहिलो हाफमा १-१ को बराबरी खेलेको नेपालले दोस्रो हाफमा थप दुई गोल खान पुग्यो । खेलको ३५ औं मिनेटमा सुरुवाती अग्रता लिएको म्यानमारका लागि यी यी ओले गोल गरेकी हुन् । 

उनले पेनाल्टी क्षेत्रको दायाँ भागबाट आएको क्रसलाई अनमार्क रहेको अवस्थामा नियन्त्रण गरेर शक्तिशाली प्रहारमा गोल गरेकी हुन् । पहिलो हाफको अन्तिम मिनेटमा अन्जलीकुमारी योन्जनले गोल गर्दै नेपलालाई खेलमा फर्काइन् । 

उनले गीता रानाको फ्रिकिकमा पेनाल्टी क्षेत्रको बायाँ भागबाट गरेको भली प्रहार गोलमा परिणत भएको थियो । खेलको ५३ औं मिनेटमा म्यानमारले पुनः अग्रता लियो । म्यानमरका लागि विन थेइङ्गी तुनले गोल गर्दै अग्रता २-१ ले पारिन् ।

 त्यस्तै खेलको ६२ औं मिनेटमा यी यी ओले व्यक्तीगत दोस्रो गोल गर्दै म्यानमारलाई ३-१ को अग्रता दिलाईन् । नेपालले यसअघि म्यानमारसँगको पहिलो भेटमा पनि ३-० ले पराजित भएको थियो । 

यस प्रतियोगितामा महिला टिमकी गोल मसिन सावित्रा भण्डारीको प्रदर्शन उत्कृट रह्यो । उनैको प्रदर्शनले नेपाली टोली प्रतियोगिताको फाइनल पुग्न सफल भएको थियो । नेपालमा हुन लागेको पाँचौ साफ च्याम्पियनसिप फुटबलको तयारीमा रहेको नेपालले साफ अघि विदेशी प्रतियोगिता खेलेको हो ।

भारत पनि साफ च्याम्पियनसिप र ओलम्पिकको तयारीमा रहेकाले नेपाल सहित म्यानमार र इरानलाई बोलाएर हिरो महिला लिगको आयोजना गरेको हो । फिफा वरियतामा ४४ औैं स्थानमा म्यानमार रहँदा इरान ६० तथा भारत ६२ औं स्थानमा रहदा नेपाल १०८ औं स्थानमा छ ।