सार्वजनिक खर्च पुनरावलोकन आयोगले बुझायो प्रतिवेदन

काठमाडौं- अर्थमन्त्री डा.युवराज खतिवडालाई सार्वजनिक खर्च पुनरावलोकन आयोगले प्रतिवेदन बुझाएको छ। विद्यमान बजेट प्रणालीलाई सुधार एवम् परिमार्जन गरी संघीय संरचना अनुरुप बनाउन अपनाउनु पर्ने कामका बारे आवश्यक सुझाव दिन गठित समितिले अर्थ मन्त्री खतिवडालाई प्रतिवेदन बुझाएको हो। 

डा. डिल्लीराज खनालको अध्यक्षतामा गठित सार्वंजनिक खर्च पुनरावलोकन आयोगको प्रतिवेदन बुझादै अर्थ मन्त्री खतिवडाले आयोगले सुल्झाएका विषयलाई सरकारले क्रमशः कार्यान्वयन गर्दै अघि बढ्ने बताए। 

मुलुकका तीनै तहका सरकारको खर्च प्रणालीको व्यवस्थापन गरी वित्तीय अनुशासन कायम गर्ने लगायतका विभिन्न पक्षका बारे प्रतिवेदनमा सुझाव दिइएको आयोगका अध्यक्ष डा. खनालले बताए। कार्यक्रममा अर्थ सचिव डा. राजन खनालले विद्यमान खर्च प्रणालीमा देखिएका समस्याहरुलाई समाधान गर्दै जाने सन्दर्भमा प्रतिवेदन सुधारको एउटा अंग भएको बताए। 

वित्त क्षेत्रमा देखिएका समस्यालाई समाधान गरी मुलुकको विकास र समृद्धिको पक्षमा टेवा पुगोस भन्ने उद्देश्यले सरकारले २०७५ साल भदौं ३ गते सार्वजनिक खर्च पुनरावलोकन आयोग गठन गरेको थियो।