अफगानी राष्ट्रपति घानीले देश छोडे

काठमाडौं– अफगानिस्तानका राष्ट्रपति असरफ घानीले देश छोडेका छन्। तालिवान सैनिकले देशको अधिक हिस्सा आफ्नो कब्जामा लिइरहेको समाचार आइरहँदा राष्ट्रपति घानीले देश छोडेका हुन्। 

अन्तराष्ट्रिय समाचार संस्था रोयर्टसका अनुसार अफगानी राष्ट्रपति घानीले देश छोडेर ताजकिस्तानतिर लागेका हुन्। 

आज बिहानदेखि राजधानीमा काबुलका विभिन्न नाकाहरुबाट तालिवानी सेनाहरु भित्रि भागमा प्रवेश गर्दै गरेको भन्ने समाचार आइरहेका थिए।

अफगान उपराष्ट्रपति अमीरुल्लाह सालेह पनि भागेको हुनसक्ने बताइएको छ। १० दिनको अवधिमा अफगानिस्तानका प्रमुख सहरहरू तालिबान लडाकुहरूे कब्जा गरेको अवस्थामा घानी राजीनामा दिनुपर्ने दबावमा थिए। यसअघि त्यहाँको गृह मन्त्रालयले शान्तिपूर्ण रूपमा सत्ता हस्तान्तरण गर्न वार्ता भइरहेको जनाएको थियो।

केही सातादेखि देशका अन्य भागमा हिंसा फैलिँदा भागेका हजारौँ अफगानहरूले काबुलमा शरण लिइरहेका छन्। तालिबान काबुल आइपुगेपछि आइतबार धेरै मानिसले पैसा निकाल्न र यात्रासम्बन्धी कागजपत्र जुटाउन दौडधुप गरेका थिए।