हाइटीमा ७.२ म्याग्निच्युडको शक्तिशाली भूकम्प, कम्तीमा ३०४ जनाको मृत्यु

पोर्ट अउ प्रिन्स (हाइटी)- हाइटीमा गएको शक्तिशाली भूकम्पमा परी कम्तीमा ३०४ जनाको मृत्यु भएको छ। शनिबार बिहान गएको ७.२ म्याग्निच्युडको भूकम्पमा परी १८ सयभन्दा बढी व्यक्तिहरू घाइते भएको स्थानीय अधिकारीहरूले जानकारी दिएका छन्। 

भूकम्पबाट ठूला भवन, होटल तथा चर्चमा बढी क्षति पुगेको बताइएको छ। सन् २०१० मा गएको शक्तिशाली भूकम्पको घाउ पूर्ण रूपमा ठीक नहुँदै हाइटीले अर्को ठूलो भूकम्पको सामना गर्नुपरेको हो। 

शनिबारको भूकम्पको केन्द्रबिन्दु हाइटीको सहर सेन्ट लुइस डुसुडबाट १२ किलोमिटरको दुरीमा रहेको अमेरिकी भौगर्भिक अध्ययन संस्था युएसजीएसले उल्लेख गरेको छ। भूकम्पको धक्का १२५ किलोमिटर टाढासम्म महसुस गरिएको बताइएको छ। 

'धेरै घर भत्किएका छन्। धेरै मानिस मरेका छन्। केही मानिस अस्पतालमा छन्,' भूकम्पको केन्द्रबिन्दु मानिएको स्थानीय क्रिस्टेला सेन्ट हिलायरले अन्तर्राष्ट्रिय समाचार संस्था एएफपीसँग भनेकी छन्।  

हाइटीका प्रधानमन्त्री डा एरियल हेनरीले भूकम्पबाट ठूलो क्षति पूगेको र उद्धार कार्य जारी रहेको उल्लेख गरेका छन्।  'घाइतेहरूको उद्धार सबैभन्दा महत्त्वपूर्ण छ,' उनले भनेका छन्, 'घाइते र अंगभंग भएकाहरूले विशेष गरी कायेस र स्थानीय अस्पतालहरू भरिएको जानकारी आएको छ।'

घाइतेहरूको उद्धार कार्य जारी छ।