भट्टराईको अपराधशास्त्रसम्बन्धी पुस्तक सर्वोत्कृष्ट

काठमाडौं– रवीन्द्र भट्टराईद्वारा लिखित ‘अफेन्डिङ एन्ड भिक्टिम्याइजेसन’  न्याय र कानुनसम्बन्धी २०७७/७८ वर्षको सर्वोत्कृष्ट पुस्तकका रूपमा पुरस्कृत भएको छ। नेपाल कानुन व्यवसायी परिषद्को २८ औं परिषद् दिवसमा आयोजित कार्यक्रममा प्रधानन्यायाधीश चोलेन्द्रशमशेर राणाले भट्टराईलाई पुरस्कृत गरेका हुन्। 

पुस्तकमा फौजदारी न्यायको अवधारणा, अपराधशास्त्र र पीडित न्यायशास्त्रको अवधारणा तथा विकसित सिद्धान्तहरूको विस्तृत विवेचना छ। अपराध र अपराधपीडितको न्यायका बारेमा ऋग्वेद, बृह्दारण्यक उपनिषद्, न्याय दर्शन र योग दर्शनमा रहेका अपराधशास्त्रीय चेतनाको चित्रण गरिएको छ। 

यस्तै अपराध तथा पीडितशास्त्रका पाश्चात्य सिद्धान्तहरूको विवेचना मात्र गरिएको छैन पूर्वीय सभ्यताका विशेष गरी चिनियाँ मान्यता, बौद्ध र ऋषिप्रतिपादित मान्यताहरूको विवेचना प्रत्यक्ष विज्ञानका आधारमा गरिएको छ। 

अपराधशास्त्र र बालन्यायमा विशेष दखल राख्ने भट्टराई नेपाल समयका स्तम्भकार हुन्। 

समारोहमा सम्बोधन गर्दै प्रधानन्यायाधीश राणाले न्यायलयमा बसेर न्याय सम्पादन गर्दा आफूले कुनै पनि दबाब र प्रभावमा परेर फैसला नगरेको बताएका थिए। ‘बेन्च गठनका विषयमा प्रश्न उठ्यो, मैले वरिष्ठताका आधारमा गठन गरें’, प्रधानन्यायाधीश राणाले भने, ‘प्रश्नहरु छन् तर दबाब र प्रभावमा परेर फैसला गरेको छैन।’ अदालतबाट फैसला हुँदा कमीकमजोरी भए पनि त्यसको मूल्यांकन इतिहासले गर्ने उनको भनाइ थियो।

काननु, न्याय तथा संसदीय मामिलामन्त्री ज्ञानेन्द्रबहादुर कार्कीले कानुन भाषा र किताबमा मात्र नभएर व्यवहारमा उर्तानुपर्नेमा जोड दिए।