एमाले निकट खेलकुद महासंघको केन्द्रीय अध्यक्ष बने पर्शुराम

विराटनगर- एमाले निकट नेपाल खेलकुद महासंघको अध्यक्षमा पर्शुराम बस्नेत (कृष्ण) निर्वाचित भएका छन्। प्रदेश १ को राजधानी विराटनगरमा मंगलबार सम्पन्न महासंघको दोस्रो राष्ट्रिय महाधिवेशनले बस्नेतको अध्यक्षतामा १ सय ७१ सदस्यीय केन्द्रीय कार्यसमिति चयन गरेको हो। 

महाधिवेशनबाट बस्नेत सर्वसम्मत अध्यक्ष चयन भएका हुन्। अरु पदाधिकारी र केन्द्रीय कमिटीमा रहनेहरुको टुंगो लाग्न बाँकी छ। खेलकुद महासंघ प्रदेश १ का निवर्तमान इन्चार्ज सन्तोष वान्तवाले बाँकी पदाधिकारीसहित केन्द्रीय कमिटीमा रहनेको टुंगो लगाउन केही समय लाग्ने जानकारी दिए। त्यसको टुंगो अध्यक्ष मण्डलले लगाउने उनको भनाइ छ। 

उनले महासंघको सांगठनिक संरचना अनुसार अध्यक्ष १, उपाध्यक्ष ५, महासचिव १, सचिव ९ र कोषाध्यक्ष १ जना तथा अरु सदस्य रहने बताए। ‘महासंघको केन्द्रीय कमिटीमा प्रदेश १ र बाग्मतीबाट १५–१५ तथा अरु प्रदेशबाट ९–९ जनाको प्रतिनिधित्व रहने छ,’ वान्तवाले भने, ‘बाँकी समावेशी र खुला भूगोलबाट समेटिने छ।’ नेकपा (एमाले)को भातृ संगठन खेलकुद महासंघको दोस्रो महाधिवेशन यही फागुन ७ गतेबाट विराटनगरमा सुरु भएको थियो।