टेनिस टोली श्रीलंका जाँदै

काठमाडौं- जुनियर डेभिस कप तथा बिली जिन किङ कपमा सहभागी हुन पाँच सदस्यीय नेपाली टोली बिहीबार श्रीलंकाको कोलम्बो प्रस्थान गर्ने भएको छ। डेभिस कपमा तीन जना ब्वाइज तथा किङ कपमा दुई गल्र्स खेलाडीले प्रतिस्पर्धा गर्ने नेपाल टेनिस संघका कार्यालय सचिव प्रवीण देवकोटाले बताएका छन्।

डेभिस कपमा आयुशमान हजुर घले, श्रृजन भट्टराई र श्रीयोग अधिकारीले नेपालको चुनौती प्रस्तुत गर्ने छन्। किङ कपमा सुनिरा थापा र प्रशंसा मोक्तानले खेल्ने छन्।

टोलीलाई नेपाल टेनिस संघकी अध्यक्ष ज्योति राणाले बुधबार एक कार्यक्रमबीच बिदाइ गरिन्। यु–१६ उमेरसमूहको दुवै प्रतियोगिता फेब्रुअरी २० देखि २५ तारिखसम्म हुनेछ।

यसैबीच मलेसियाको कुचिङमा हुने वर्ल्ड जुनियर टेनिस कम्पिटीसन, फाइनल क्वालिफाइङ इभेन्टका लागि ३ गर्ल्स खेलाडी छनोट भएको कार्यालय सचिव देवकोटाले जानकारी गराए। मार्च २० देखि २५ तारिखसम्म हुने प्रतियोगिताका लागि स्वस्तिका विष्ट, शिभाली गुरुङ र समृद्धि महर्जन छनोट भए। प्रशिक्षकमा कान्छा खड्ग छन्।