पुष्पलाल स्मृति राष्ट्रिय वरीयता ब्याडमिन्टन : प्रिन्स र रसिला क्वाटरफाइनलमा

काठमाडौं- नेपाल पुलिसका प्रिन्स दाहाल र आर्मीकी रसिला महर्जन विराटनगरमा जारी ‘लिनिंग १२औं पुष्पलाल स्मृति राष्ट्रिय वरीयता ब्याडमिन्टन प्रतियोगिता - २०२३’ को क्वाटरफााइनलमा प्रवेश गरेका छन्।  

नेपाल खेलकुद महासंघ अन्तरगतको राष्ट्रिय ब्याडमिन्टन संघ, नेपालको आयोजनमा भएको प्रतियोगितामा शीर्ष १६ वरीयता तर्फको पुरुष एकल लिगको समूह बीको खेलमा प्रिन्सले नेपाल पुलिसका जीवन आचार्यलाई २१–९, २१–१४ ले पराजित गर्दै क्वाटर फाइनल प्रवेश गरेका हुन्। प्रिन्सले आफ्नो समूहको तीनै खेलमा जित हात पार्दै क्वाटर फाइनल प्रवेश गरेका हुन्। सोही समूहबाट उपबिजेताको रुपमा कास्कीका विधान अधिकारी पनि क्वाटर फाइनल पुगे। विधानले एक जित र एक वाकओभर प्राप्त गर्दै दुई जितका साथ क्वाटरफाइनल पुगेका हुन्। आजको खेलमा अधिकारीले पुलिका पूर्ण बहादुर थापाबाट वाक ओभर प्राप्त गरेका थिए।

पुरुषको समूह ए बाट नेपाल पुलिसका विष्णु कटुवाल विजेताको रुपमा क्वाटर फाइनल प्रवेश गरे। उनले दुई खेलमा जित र एक वाकओभरका साथ तीन खेल जित्दै क्वाटर फाइनल प्रवेश गरेका हुन्। आज सम्पन्न खेलमा कटुवालले आर्मीका रुकेश महर्जनलाई १९–२१, २१–१६, २१–५ ले पराजित गरे। यस्तै यस समूहबाट राकेश महर्जनले पनि उपबिजेताको रुपमा क्वाटरफाईनलमा स्थान बनाए। रुकेशले एक जित र एक वाकओभर प्राप्त गरेका थिए।

समूह सीबाट एपिएफका क्षितीज खनाल विजेता र देवराज राना उपविजेता बन्दै क्वाटरफाईनलमा स्थान पक्का गर्न सफल भए। क्षितिजले आफ्नो तीनै खेलमा जित निकाल्दै क्वाटर फाइनल प्रवेश गरेका हुन्। आज सम्पन्न खेलमा क्षितिजले देवराज रानालाई २१–१५, १८–२१, २१–१८ पराजित गरे। देवराजले अघिल्लो दुई खेलमा जित निकाल्दै उपविजेता बनेका हुन्। यस समूहको अर्को खेलमा एपिएफका बिजित थापा मगरले पुलिसका दीपक बोहरालाई पराजित गरे। अर्थहीन खेलमा मगरले बोहरालाई २१–१५, २१–१६ ले पराजित गरेका थिए।

समूह डी तर्फ आर्मीका प्रफुल महर्जन विजेता र नेपाल पुलिसका सुनिल जोशीले उपबिजेताको रुपमा क्वाटरफाईनलमा स्थान बनाए। प्रफुलले तीन खेलमा तीनै खेलमा जित हात पारे। आज सम्पन्न खेलमा महर्जनले जोशीलाई २१–६, २१–१३ ले पराजित गरे। सुनिले तीनमा दुई खेललाई आफ्नो पक्षमा पार्दै क्वाटर फाइनल यात्रा तय गरेका हुन्। यस समूहको अर्को खेलमा क्वाटरफाईनलको प्रतिस्पर्धाबाट बाहिरी सकेका आर्मीका नरेन्द्र बम र अनिल मल्लबिचको खेलमा बमले जित हात पारे। बमले मल्लमाथि १६–२१, २१–१९, २१–१५ ले पराजित गरे।

अव क्वाटरफाईनमा पुलिसका बिष्णुले एपिएफका देवराजसंग, आर्मीका प्रफुलले कास्कीका बिधानसंग, आर्मीका रुकेशले एपिएफका क्षितिजसँग, पुलिसका सुनिलले पुलिसकै प्रिन्ससंग सेमिफाईनल प्रवेशका लागि प्रतिस्पर्धा गर्नेछन्।

महिला तर्फ शीर्ष १२ बरीयताको एकल खेलमा समूह ए बाट आर्मीकी रसिला महर्जन विजेता र पुलिसकी निता लम्साल उपविजेता, समूह बी बाट आर्मीकी अमिता गिरी विजेता र एपिएफकी शोभा गौचन उपविजेता, समूह सी बाट आर्मीकी अनुमाया राई विजेता र एपिएफकी सुनयना मुखिया उपविजेता, समूह डी बाट एपिएफकी जेशिका गुरुङ विजेता र आर्मीकी प्राथना देउवा उपबिजेताको रुपमा क्वाटर फाइनल प्रवेश गरेका छन्।

आज सम्पन्न खेलमा आर्मीकी रसिलाले पुलिसकी नितालाई २१–१४, २३–२१, आर्मीकी अमिता गिरीले एपिएफकी शोभा गौचनलाई १३–२१, २१–१५, २१–१५, आर्मीकै अनुमायाले एपिएफकी सुनयना मुखियालाई २१–१९, २१–७ र एपिएफकी जेशिका गुरुङ्गले आर्मीकी प्राथना देउवालाई २१–१०, २२–२० ले पराजित गरे।

अव क्वाटरफाईनलमा रसिलाले सुनयना, जेशिकाले शोभा गौचन, निताले अनुमाया र अमिता गिरीले प्राथना देउवासँग सेमिफाईनल प्रवेशका लागि प्रतिस्पर्धा गर्नेछन्।