प्रिमियर लिगमा सिटी र युनाइटेडको जित

काठमाडौं- इंग्लिस प्रिमियर लिगमा म्यानचेस्टर सिटी र  म्यानचेस्टर युनाइटेडले आइतबार राति जित निकालेका छन्। आइतबार राति लिड्स युनाइटेडको इलियन रोड रंगशालामा सम्पन्न खेलमा म्यानचेस्टर युनाइटेडले २–० को जित निकालेको हो।

खेलको ६७ प्रतिसत समय बलमा नियन्त्रण बनाए पनि म्यानचेस्टर युनाइटेडले पहिलो हाफमा गोल गर्न सकेको थिएन। खेलको ८०औं मिनेटमा मात्र मार्कस रासफर्डले गोल गर्दै युनाइटेडलाई अग्रता दिलाएका थिए।

यता, पहिलो गोलको पाँच मिनेटमै म्यानेस्टरले अग्रता दोब्बर बनायो। यसपटक अलेजेन्द्रो गर्नाचोले गोल गरेका थिए। खेलमा ३३ प्रतिसत समय बलमा नियन्त्तण लिए पनि लिड्सले १६ पटक विपक्षीको पोस्टतर्फ आक्रमण गरेको थियो।

यता, म्यानचेस्टर सिटीकै रंगशालामा भएको खेलमा चाहिँ घरेलु टिमले एस्टन भिल्लामाथि ३–१ को जित निकालेको छ। यो जितसँगै उसले आर्सनलसँगको अंकदुरी पनि घटाएको छ।

यसअघि आठ अंकको अग्रता बनाइसकेको आर्सनलले पछिल्ला दुई खेलमा जित निकाल्न सकेको छैन। एकमा हार र एकमा बराबरी खेले पनि आर्सनल अहिले ५१ अंकका साथ शीर्षस्थानमा छ। दोस्रो स्थानको सिटीको भने ४८ अंक रहेको छ।

आर्सनलले पछिल्लो दुई खेलमा चार अंक गुमाएपछि यस्तो भएको हो। गएराति सिटीलाई जित दिलाउनका लागि रोड्री, इल्कए गुन्डोगन र रियाद महरेजले गोल गरेका थिए। भिल्लाले एक गोल फर्काए पनि ऊ सिटीविरुद्ध खेल लयमा भने फर्किन सकेन।

यता, गएराति जित निकालेको म्यानचेस्टर युनाइटेड भने ४६ अंकका साथ तेस्रो स्थानमा छ। लिड्स रेलिगेसन क्षेत्रभन्दा एक स्थानमात्र अघि रहेको छ।