सिरहाबाट चार लाख ३५ हजार क्कली नोटसहित दुई जना पक्राउ

काठमाडौं- चार लाख ३५ हजार नेपाली नक्कली नोटसहित प्रहरीले दुई जनालाई पक्राउ गरेको छ। सशस्त्र प्रहरी बलको इन्टेलिजेन्स ब्युरोले शनिबार साँझ सिरहाबाट दुई जनालाई पक्राउ गरेको हो।

पक्राउ पर्नेमा  सिरहाको  लहान नगरपालिका–१९ का ३० वर्षीय मोहम्मद ओसिन र  लहान–१० का २२ वर्षीय मोहम्मद राज शेख छन्। लहान–८ स्थित पशुपति माध्यमिक विद्यालयनजिकको रोडबाट उनीहरूलाई नियन्त्रणमा लिइएको सशस्त्र प्रहरीका नायब उपरीक्षक शैलेन्द्र थापाले बताए।

उनीहरूको साथबाट ४३५ थान एक हजार दरका नक्कली नोट, नोट बनाउन प्रयोग गरिने कागजको बन्डल, दुईथान मोबाइल सेट, सातथान सिमकार्ड र एक हजार ५५ रुपैयाँ समेत बरामद गरिएको सशस्त्र प्रहरीले जनाएको छ।

बरामद सामानसहित उनीहरूलाई आवश्यक कारबाहीका लागि इलाका प्रहरी कार्यालय लहानमा बुझाइएको नायब उपरीक्षक थापाले जानकारी दिए।