सत्तारुढ गठबन्धनले प्रधानमन्त्रीलाई राष्ट्रपति निर्वाचनसम्म पनि नपर्खिने देखियो : नेता नेपाल
काठमाडौं– नेकपा एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले सत्तारुढ गठबन्धनभित्र खटपट सुरु भइसकेकाले प्रधानमन्त्री पुष्पकमल दाहाल प्रचण्डलाई राष्ट्रपति निर्वाचनसम्म पनि नपर्खिने संकेत देखिएको बताएका छन्।
राष्ट्रपति निर्वाचन आगामी २५ फागुनमा हुने निर्वाचन आयोगले कार्यतालिका सार्वजनिक गरिसकेको छ।
शनिबार नेकपा एसको ललितपुर बालकुमारीमा जारी पाँचौं केन्द्रीय कमिटी बैठकमा नेता नेपालले यस्तो खुलासा गरेका हुन्।
उनले भने, ‘सत्तारुढ गठबन्धनले प्रचण्डलाई कहिलेसम्म थेग्ने हो थाहा छैन। राष्ट्रपतिको चुनावसम्म थेग्ने होला। तर त्योभन्दा पहिले नै देखिरहेका छौं, खटपट भइसकेको छ। तरल राजनीतिक अवस्था कहिलेसम्म कायम रहन्छ, भन्न सक्ने अवस्था छैन।’
नेता नेपालले सात थरी (सात दलीय गठबन्धन)हरुकै कारण संविधान पालना हुन्छ वा हुँदैन भन्ने विषयमा पनि चिन्ता लाग्न थालेको सुनाए। गणतन्त्र नमान्ने, राजतन्त्रको वकालत गर्र्नेहरु सरकारमा रहेकाले संविधान बचाउनेतर्फ सबैले ध्यान दिनुपर्ने उनको भनाइ छ।
सम्पर्क
फोन : +977-1-4790242 / +977-1-4790040
इमेल : nepalsamayanews@gmail.com