एम्बुलेन्सबिनाको मनाङ अस्पताल

मनाङ– जिल्ला अस्पताल मनाङमा एम्बुलेन्स नभएपछि बिरामीलाई समस्या भएको छ। एम्बुलेन्स अभावका कारण बिरामी समयमै स्वास्थ्योपचार पाउनबाट वञ्चित हुँदै आएका छन्।

एम्बुलेन्स अभावका कारण बिरामी उपचारका लागि अन्य सवारी साधनमा कष्टकर यात्रा गर्न बाध्य छन्। पर्यटकीय क्षेत्र मनाङमा आएका बाह्य तथा आन्तरिक पर्यटकलाई पनि बिरामी पर्दा स्वास्थ्य संस्था जान समस्या भइरहेको छ। 

पर्यटक तथा स्थानीयलाई अस्पतालसम्म पुर्‍याउन एम्बुलेन्सको खाँचो रहेको जिल्ला अस्पतालका प्रशासन विभागका प्रमुख रहमद अन्सारीले बताए। ‘अस्पतालसित एम्बुलेन्स छैन। गम्भीर प्रकृतिका बिरामीलाई अन्यत्र रिफर गर्नुपर्ने अवस्था भए एम्बुलेन्स खोज्दाखोज्दै बिरामीको ज्यान जाने हो कि भन्ने त्रास हुन्छ’,  उनले भने।

उनका अनुसार गाउँपालिकामा भएका एम्बुलेन्स बिग्रिएर थन्किएका छन्। जिल्ला रेडक्रस सोसाइटीसित भएको एम्बुलेन्स मनाङ ङिस्याङ गाउँपालिकामा बिग्रिएर थन्किएको छ। सदरमुकाम चामे गाउँपालिकाको एम्बुलेन्स पनि बिग्रिएको छ। ‘अस्पतालसित आफ्नै एम्बुलेन्स एकदमै आवश्यक छ’, अन्सारीले भने।

एम्बुलेन्सका लागि रेडक्रसको भर पर्नुपर्ने अवस्था अन्त्य गर्न अस्पतालले स्थानीय, प्रदेश र संघीय सरकारलाई गुहार्दै आएको छ। प्रमुख जिल्ला अधिकारी सुप्रभा खनाल ढुंगेलले पटक–पटकको बैठकमा एम्बुलेन्सको आवश्यकताबारे छलफल गरी सम्बन्धित निकायसँग माग गर्दै आएको बताए।

‘स्थानीयलाई सहज स्वास्थ्योपचार प्रदान गर्ने उद्देश्यले एम्बुलेन्स सेवा उपलब्ध गराउन प्रतिबद्ध भई सम्बन्धित निकायसँग समन्वय  गरिरहेका छौं’, उनले भने। 

एम्बुलेन्स अभाव हुँदा गत वर्ष बिरामी हुँदा हेलिकोप्टर चार्टड गरेर पोखरा गएको स्थानीय कर्मछिरिङ गुरुङले बताए। सरकारले एम्बुलेन्स सेवा उपलब्ध गराएको अवस्थामा नागरिकले सास्ती भोग्नु नपर्ने उनको भनाइ छ। मनाङमा कोही  गम्भीर बिरामी भएमा अस्पताल पुर्‍याउन हेलिकोप्टरको भर पर्नुपर्ने हुन्छ। तर यहाँको मौसम अधिकांश समय प्रतिकूल रहने हुँदा सडककै भर पर्नुपर्ने स्थानीय बताउँछन्।