पोखरा विमान दुर्घटनामा बेपत्ता यात्रुको खोजी जारी

काठमाडौं– नेपाली सेनाले काठमाडौंबाट पोखराका लागि उडेको यती एयरको दुर्घटनाग्रस्त विमान परी हराइरहेका एक जनाको खोजी भइरहेको जनाएको छ।

यती एयरको जहाज गत १ माघमा कास्कीको पोखरास्थित सेती खोचमा दुर्घटनाग्रस्त हुँदा विमानमा सवार ७२ जनाले ज्यान गुमाएका थिए। दुर्घटनामा परेका एक जना हालसम्म बेपत्ता छन्।

कास्की जिल्ला सुरक्षा समिति बैठकले ७ माघमा  दुर्घटना स्थलमा खोज तथा उद्धारमा खटिएको टोलीलाई फिर्ता गर्ने निर्णय गरे पनि दुर्घटनामा परेकामध्ये एक जनाको अवस्था अझै अज्ञात रहेकाले खोजी जारी रहेको सैनिक प्रवक्ता कृष्णप्रसाद भण्डारीले बताए।

नेपाली सेना, नेपाल प्रहरी र सशस्त्र प्रहरीको संयुक्त टोलीले खोज तथा उद्धारको क्रममा ७१ जनाको शव फेला पारेका थिए। उद्धारका क्रममा भेटिएको ब्ल्याक बक्सलगायतका सामग्री नेपाल नागरिक उड्डयन प्राधिकरणलाई हस्तान्तरण गरिएको थियो। विमान दुर्घटनाको खबर प्राप्त गर्नासाथ खोज तथा उद्धार कार्यलाई सेनाले तीव्रता दिएको थियो।